2030 гъэм ирихьэлIэу Къэбэрдей-Балъкъэрым электрокъарууэ езым къилэжьыжым и куэдагъыр киловатт мелард 1,8-м щхьэдэхынущ. Апхуэдэ гугъэхэр уагъэщI республикэм и энергетикэ IэнатIэм иужьрей илъэсхэм жыджэру зэрызиужьым.

Къэбэрдей-Балъкъэрым промышленностымкIэ, энергетикэмрэ сатумкIэ и министр Iэхъуэбэч Щамил иджыблагъэ къызэрыхигъэщамкIэ, республикэм къаруушхуэ ирехьэлIэ щIыналъэм и энергетикэ IэнатIэр егъэфIэкIуэным, абы и лъэщагъым къыхэгъэхъуэным.

«ЩIыналъэм ГЭС-у тIу щIэуэ щаухуэ. «Шэрэджыр» мегаватт 23,4-рэ и лъэщагъыу, киловатту 87-рэ езым къыхуэлэжьу щытынущ, инвестицэу сом меларди 6,9-рэ псори зэхэту къыхалъхьэнущ. «Бахъсэн Ищхъэрэм» мегаватт 25-рэ и лъэщагъыу, езым электрокъарууэ киловатт 90 къыхуэлъэщу, инвестицэ ахъшэу сом меларди 7,5-м нэблагъэ хуэзэу», - жиIащ Iэхъуэбэчым.       

Иджыпсту республикэм мыхьэнэшхуэ ирет щыIэ электростанцхэр къэгъэщIэрэщIэжынымрэ станцыщIэхэр ухуэнымрэ, дыгъэм, жьым къат хуабэхэри хэтыжу. Дыгъэм, жьым я къарухэмкIэ лажьэ станцхэр щIыналъэм и энергетикэ программэм къыгуэхыпIэ зимыIэ и Iыхьэ хъууэ щIедзэ.

ХЬЭЩОКЪУЭ Алыдж.