Арт жыллада  Къабарты-Малкъарда солургъа сюйгенлени санына танг къошула барады. Ол себепден турист  маршрутлагъа сурам уллулай къалады.  Чегем чучхурлагъа, Чирик кёллеге, Бызынгыгъа эм  башха жерлеге барыргъа сюйгенле да кёпдюле.  Аны бла байламлы  тау  жолла къоркъуусуз болурча аслам эс бурулады.   Ол санда  «Экинчи Чегем-Булунгу» жолгъа да тынгылы ремонт этиледи. Ишле болжалдан кеч къалмай тамамланырларын республиканы Башчысы дайым контрольда тутады.  

Саулай алып айтханда, объектни уллулугъу 27 километрге жетеди. Алгъаракълада Чегем чучхурланы тийресинде эки километр чакълы бирде тийишли ишлени иги кесеги  толтурулгъандыла. Аны кезиуюнде суу таламазча, черек жагъаланы бетон къабыргъала къуюп  кючлегендиле эм жолну да иги кесекге кенгертгендиле. Бусагъатда уа подряд организацияны келечилери жардан таш топуракъ оюлмазча бетондан къабыргъала къуюп кюрешедиле. 

Ишлени асламысы  Чегем чучхурланы бла   Булунгуну эм Эл-Тюбюню   арасында 25 километр тенгли бир жерде барадыла. Мында да  черек жагъаланы кючлейдиле, жардан таш, топуракъ оюлмазча мадар этиледи эм эски коммуникацияланы алышадыла.    Ызы бла специалистле жолну мурдорун  жарашдырып, тротуарла салып, къоркъуусузлукъну жалчытырча аберилени да тохташдырып башларыкъдыла.

Андан сора да, «Къоркъуусуз эм тынгылы автомобиль жолла» миллет проектге кёре, «Чегем» турбазагъа баргъан Булунгу – Башил жолну 17,7 километри жангыртыллыкъды. Къыйын тау жерледе  жолну ишлерге тынч тюйюлдю, болсада  организацияны келечилери борчларын болжалдан кеч къалмай толтурургъа кюрешедиле.

Планнга кёре объект 2026 жылгъа битерге керекди.