2024 гъэм Къэбэрдей-Балъкъэрым и шхапIэхэм псоми зэхэту фейдэуэ кърагъэщIам и куэдагъымкIэ къэралым и щIыналъэ нэхъыфIипщIым яхыхьащ. Дызэрыт илъэсым къриубыдэу абыхэм хэхъуэу яIэр сом мелуан 945,1-рэ хъуащ, е проценти 135,4-кIэ нэхъыбэщ 2023 гъэм елъытауэ. Апхуэдэ хъыбархэр иджыблагъэ зэбгригъэхащ Урысейм СтатистикэмкIэ и къэрал управленэм.
Зэрагъапщэ лъэхъэнэм къриубыдэу кафехэмрэ ресторанхэмрэ хэхъуэу яIахэр къапщытэжа нэужь Къэбэрдей-Балъкъэрыр абы и лъэныкъуэкIэ къэралым зи Iуэхур щынэхъыфI щIыналъипщIым хабжащ икIи етIуанэ увыпIэр урысей рейтингым щиубыдащ. Ди республикэм къызэринэкIащ Удмуртиер, хэхъуэу къигъэлъэгъуащ проценти 126,4-рэ. АдэкIэ къыкIэлъокIуэ Новгород Ищхъэрэ областыр (проценти 126-рэ), Мордовиер (проценти 123,9-рэ), Ставрополь крайр (проценти 122-рэ).
КИФЩI-м и щIыналъэхэм ящыщу къэралым щынэхъыфIипщIым Налшыкрэ Ставропольрэ фIэкIа яхэткъым. Рейтингым япэ увыпIэр щызыубыдар Алтай республикэрщ – проценти 158,2-рэ хэхъуэу къигъэлъэгъуащ, нэгъабэрей бжыгъэхэм елъытауэ.
Экспертхэм нэгъабэ къызэрабжамкIэ, шхапIэхэм я куэдагъым процент 15-кIэ 2024 гъэм къыхэхъуэн хуейуэ щытащ. 2023 гъэм икIэхэм ирихьэлIэу шхапIэхэм псоми зэхэту я хэхъуэр сом триллиони 4,-4,2-рэ хъун хуейуэ къабжамэ, 2024 гъэм ар сом триллиони 4,8-м зэрынэхьэсыну къалъытэ.
ХЬЭЩЫКЪУЕЙ Олег.
