Нальчикни Искож тийресинде Маданиятны айнытыу арасында Ата журтну къоруулаучусуну кюнюне жораланып уллу концерт кёргюзтюлгенди. Аны «Патриот» жамауат биригиу къурагъанды. Анга республикада атлары айтылгъан жырчыла бла бирге студентле, сахнагъа энди чыгъа башлагъан жашчыкъла бла къызчыкъла да къатышхандыла.
Къууанчха келгенлени «Аскер къарындашлыкъ» битеуроссей жамауат биригиуню регион бёлюмюню толтуруучу комитетини таматасы, Кишиликни ордени бла саугъаланнган, республикада Жамауат палатаны къауумуна кирген Владимир Абаноков алгъышлагъанды. «Бусагъатдагъы заман бизни хар бирибизден да уллу эслиликни эмда тюз оюм эте билиуню излейди. Жашларыбыз энчи аскер операцияда нацизмге къажау къазауат этедиле. Бизни борчубуз а алагъа не жаны бла да себеплик этергеди», - дегенди ол.
Искусстволаны Шимал-Кавказ къырал институтуну преподаватели, профессор Эфендиланы Фуат а бюгюнлюкде аскер борчларын толтура тургъанланы бютюн бек алгъышларгъа сюйгенин айтханды. «Ол жашланы атлары Уллу Ата журт урушну кезиуюнде жигитлик этенле бла бир тизгинде турлукъдула, къыралыбызны тарыхында алтын харфла бла жазылып, ёмюрлеге сакъланырыкъдыла», - деп чертгенди ол.
Концертни кезиуюнде белгили совет эм россейли жырла айтылгъандыла. Аланы араларында халкъ жырла да эшитилгендиле. Бу ишге СКГИИ-ни культура эм искусство колледжини студентлери кеслерини аслам юлюшлерин къошхандыла.
