Орта кюн «Нальчик» спорт арада аскер къол тутушуудан Миллет гвардияны аскерлерини арасында Россейни чемпионаты башланнганды. Анга битеу федерал округланы келечилери къатышадыла. Эришиу тамата лейтенант эм журналист Анатолий Ягодинни хурметине жораланнганды.
Эришиуге къатышыргъа къыралны федерал округларындан Миллет гвардияны келечилери келгендиле – битеу да 15 команда. Чемпионатны Аскерни спорт комитети къурагъанды. Жыйылыуну КъМР-ни экономика эм жамауат къоркъуусузлукъ жаны бла советини таматасы Казбек Татуев ачханды.
- Хар биригиз да хорлам болдурур мурат бла келгенсиз да, анга жетеригизни тежейме. Аскер къуллукъладасыз да, ол да тынч, ырахатлы ётсюн, – дегенди Казбек Борисович.
Ызы бла къонакъланы алларында республиканы жаш артистлери фахмуларын кёргюзтгендиле.
Анатолий Ягодин Шимал Кавказда къуллукъ этгенди. Аскерчини жашауунда чыгъармачылыкъ энчи жерни алгъанды. Тамата лейтенант Ягодин назмула жазгъанды, «Зоркий часовой» газетде аскер корреспондент болуп ишлегенди.
90-чы жылланы биринчи жарымында чечен уруш баргъан кезиуде, аны бу регионнга журналистнича ашыргъан эдиле. 1996 жылда ол командировкасыны кезиуюнде ёлгенди.
Таппасханланы
Аминат.