Быйыл мартны ал кюнлеринден башлап губула къабып республиканы медицина учрежденияларына 300 адам келгенди, деп билдиргендиле Роспотребнадзорну КъМР-де бёлюмюнден.

Бизни республика кърым геморрагия безгек (КГЛ) жайылыргъа къоркъуулу жерге саналады. Ол саулукъгъа уллу заран салгъан, бирде ёлюмге да келтирген аман аурууду. Кёбюсюнде ол губу къапхандан сора жугъады, алай къуртну къол бла эзгенде да хата жетерге боллукъду. Андан сора да, аладан боррелиоз, энцефалит дегенча ауруула да жугъарларына къоркъуу барды. 

Къуртла кёбюсюнде бийик ёсген хансда бла юлкюледе турургъа сюедиле. Аладан жаныуаргъа эм адамгъа ёрлерге да тынч болады. Ала бегирек кюн салкъында эм чегет жерледе тирилирге ёчдюле. 

Хар замандача, профилактика халда губуланы къурутурча тийишли препаратла   сабийлени саулукъларына бакъгъан, билим берген учрежденияланы, санаторийлени, стадионланы, паркланы, медицина организацияланы тийрелеринде эмда башха жерледе  чачдырыладыла.

Къалай-алай болса да, губула заран жетдирмезча эм биринчи адам кеси сакъ болургъа керекди. Табийгъатха чыкъгъанда, санланы жалан этмесе игиди. Андан сора да, юсюн-башын, кийимлерин эм башха хапчукну да къагъаргъа-согъаргъа борчлуду. Бир тюрлю сылтау бла губу терини ичине кирген эсе, эм игиси врачха барып чыгъарсады. Кеслери чыгъаргъанла уа башын анда къоймазгъа кюреширге керекдиле. Аны мияла оруннга салып анализ этерге элтсе уа, бютюн аламат боллукъду. 

Курданланы Сулейман.