Билдиргенибизча, бу кюнледе Нальчикде от ёчюлтюу-къутхарыу спортдан регионла аралы эришиу бардырылады. Анга СКФО-ну субъектлеринден 7 команданы санында 130 адам къатышадыла. Къауумлада тиширыула да бардыла. Ала бары да жыл санларына кёре юч къауумгъа юлешинип эришедиле. Профессионал от ёчюлтюучюле бла бирге Нальчикге жаш тёлю да келгенди.

Аланы алларында 4 тюрлю борч салынып эди. Судьяла, командаладан сора да, энчиликде да бек кючлюлени тохташдырлыкъдыла. От ёчюлтюу-къутхарыу спортдан битеуроссей категориялы судья Юрий Кашинни оюмуна кёре, къутхарыучула не къадар терк борчларын толтурсала, ол къадар бир игиди. Адамланы жашаулары аланы гиртчиликлери эм усталыкълары бла байламлы болгъанын барыбыз да билебиз.

Алай бла бу эришиуде хорлагъанла Битеуроссей кезиуге СКФО-ну атындан къатышырыкъдыла. Эсепле шабат кюн чыгъарыллыкъдыла.

Таппасханланы Аминат.