Роспотребнадзорну Къабарты-Малкъарда  управлениясы табийгъатда солургъа сюйгенлеге саулукъларына заран жетдирмезча тийишли жорукъланы унутмазгъа чакъырды.

Специалистле айтханнга кёре, терк бузулгъан продуктла холодильник-сумкада сакъланыргъа керекдиле. Аны бла  бирге аш-суу  сынамлы   тюкенледе алынса игиди. Ол санда  этни къоркъуусузлугъуна бек сакъ болургъа тийишлиди. Таныгъан жеринг тюйюл эсе, къагъыты бла шагъырейленирге эркинсе.
Пикникге сютден ичгиле, иги бишмеген, татлы ашарыкъла  алыргъа жарамайды, алагъа микробла минерге бек сюедиле.

Азыкъланы  ашардан алгъа эм андан сора да, къурт-къумурсха, чычханла эм кирли жанла тиймезча болургъа керекдиле. Ол себепден табийгъатха чыкъгъанда,  аланы  башлары иги бегитилген пластик контейнерледе неда  энчи плёнка бла чулгъап сакъларгъа борчлуду.    

Къууурулургъа сайланнган эт бек семиз болмаса игиди. Агъачдан эсе хазыр кёмюр, темир шишле эм бир кере хайырланнган  пластик адырла хайырланыргъа крекдиле.  Мангалда эт иги бишмесе,  70-75 градусда ёлген  бактерияла сакъланыргъа боллукъдула.  Аны бла бирге  тийишли гигиена да  сакъланыргъа керекди – сапын бла къолланы жуугъан  кесин кёп хатадан сакъларыкъды. 

- Болсада  бир тюрлю сылтау бла ичигиз ётюп,  къусаргъа тартып башлагъан эсегиз,  кесигиз аллыгъызгъа багъылыргъа мадар излемегенлей, врачха барыргъа керекди.

Андан сора да, бусагъатда губула  тири жайылгъан кезиудю, аны ючюн  табийгъатха чыгъардан алгъа энчи сакълыкъ изленеди. Эм биринчиден  адам эти ачылмазча кийинирге борчлуду.  Профилактика халда дарман салдырса уа,  къоркъуулу аурууладан сакъланыргъа ахшы себеплик этерикди,- деп къошхандыла ведомствода. 

Бизни корр.