«Коррупциягъа къажау кюрешни бардырыуну юсюнден» 273-чю федерал законнга, Президентни «2021-2024 жыллада улутхачылыкъгъа къажау кюреш бардырыуну миллет планыны юсюнден» указына, «Къабарты-Малкъарда коррупцияны профилактикасыны юсюнден» республикалы законнга тийишлиликде Къабарты-Малкъарны районларыны бла шахарларыны администрациялары муниципалитетлени ишчилерини, жамауатны арасында да улутхачылыкъгъа къажау ишни тири бардырадыла. 

Аны чегинде хар муниципалитетни официал сайтында целевой программала басмаланнгандыла. Администрацияланы ишчилери усталыкъларын ёсдюрген юйрениулеге барадыла. Муниципал къуллукъчула эм бу ишге кандидатла кеслерини, юйдегилерини, акъылбалыкъ болмагъан сабийлерини да файдаларыны, къоранчларыны, мюлклерини эм мюлк бла байламлы чыкъгъан байламлыкъланы юслеринден информацияны берирге борчлудула. Жамауатха да жарыкъландырыу программала къураладыла, Улутхачылыкъгъа къажау кюреш бардырыуну кюнюне аталып, буклетле, плакатла, эсгертиулери бла къагъытла чыгъарыладыла.

Бу иш ведомствола кючлерин бирикдирип кюрешселе бютюн хайырлыды. Улутхачылыкъда терсленнген адамланы табыу эм жууапха тартыу, профилактиканы бардырыу прокуратураны, ич ишле органланы, следствие комитетни къарауларындады. КъМР-ни Прокуратурасыны бу жаны бла законодательствону толтуруугъа жууаплы бёлюмню прокурору Элеонора Марзоева билдиргеннге кёре, ала былтыр 1428 бузукълукъну ачыкълагъандыла, аланы асламысы файданы бла мюлкню юсюнден толу болмагъан неда ётюрюк шартланы бериу, чыкъгъан даулашланы тамамлауда мадар этмеу бла байламлы болгъандыла. 

Президентни 2021-2024 жыллагъа планына кёре улутхачылыкъгъа къажау ишге жамауатны, ол санда уа волонтёрланы да къатышдырыргъа, коррупциягъа къажау комиссияланы санына НКО-ланы, илму эм эксперт сообществоланы келечилерин да къошаргъа тийишлиди. Къабарты-Малкъарда «Коррупциягъа къажау кюреш бардырыу эм жамауат къоркъуусузлукъну сакълау жаны бла комитет» регионла аралы жамауат организацияны управлениясы барды. Аны башчысы Къудайланы Аслан айтханнга кёре, аланы баш борчлары улутхачылыкъны тыйыуду, нек дегенде ол экономика эм социал айныугъа чырмау болгъан къоркъуулу шартды. «Аны бла бирге уа жарыкъландырыу бла да кюреширге тюшеди. Бизге болушлукъ излеп тюрлю-тюрлю жарсыулары бла адамла келедиле. Алагъа къайда коррупция болгъанын, къайда уа проблеманы ишчи низамда тамамларгъа жарагъанын ангылатабыз. Бу ишни хайырлылыгъын да кёребиз», - дегенди ол.  

Палатаны коррупциягъа жамауат къоркъуусузлукъ, законлукъну сакълау эм ОНК бла байламлыкъла жюрютюу комиссиясыны башчысы Хачим Машуков жамауатны жанындан контрольну не къадар къатыландырыргъа чакъыргъанды. Ол оюм этгенден, адамланы, жамауат организацияланы бу ишге аслам къатышдырыу право сакълаучу органлагъа бла жер-жерли администрациялагъа уллу себеплик боллукъ эди.

Жыйылыуну эсеплерине кёре, сейирлери болгъан ведомстволагъа эсгертиуле жарашдырылгъандыла.

Кульчаланы Зульфия.