Къабарты-Малкъар къырал аграр университетде экономика факультетде «Россельхозбанкны кюню вузда» деген ат бла тюбешиу болгъанды. Аны бу финанс учреждение аграр вузла бла байламлыкъланы кючлендирир умутда къурагъанды.

Тюбешиуде банкда эмда регионну агропромышленность бёлюмюнде компаниялада бла предприятиялада ишге орналыу жаны бла онгланы, студентлени практикагъа чакъырыуну юсюнден айтылгъанды. Банкны келечилери эл мюлкню айнытыуну, финанс окъуулулукъну кючлендириуню, «Я в Агро» платформаны да юслеринден лекцияла бардыргъандыла.

КъМКъАУ-гъа уа ол кюн Россельхозбанкны келечилери Ирина Доткулова бла Ислам Яганов келген эдиле. Ала экилери да бу вузну тауусхандыла. Кеслери юслеринде эл мюлк вузда окъугъан специалистлеге урунуу рынокда сурам болгъанын шарт кёргюзтгендиле.

Ирина Доткулова банкда карьера къурауну, сагъынылгъан платформа къалай ишлегенини, тынгылы резюме къалай жазаргъа боллугъуну юсюнден хапарлагъанды. Ислам Яганов а финансла сферада хыйлачылыкъны эмда банкны ишини юсюнден кёп зат айтханды.

Университетни атындан тюбешиуге студентлени иш бла жалчытыргъа себеплик этген бёлюмню башчысы Зарема Курашинова, факультетни деканы Гумар Бекаров, аны орунбасарлары Зумакъулланы Фатимат бла Хочуланы Зухра да къатышхан эдиле.

Улбашланы Мурат хазырлагъанды.