Нальчик шахар округда орамланы жангыртыу ишле тири барадыла. Специалистле шёндю Симиренко орамда къармаша турадыла. Шахарны администрациясындан билдиргенлерине кёре, анда асфальт иги да тозурагъан эди. Аны себепли, сора дагъыда ол тийреде жашагъанланы тилеклерине да эс буруп, орамны жангыртыу планнга къошаргъа оноу этилгенди. Алай бла шёндю анда эски асфальтны къырып кетергендиле, жангысын жаяргъа хазырлап, энди аны да этип башлагъандыла. Ишни келир айны ортанчыларында бошаргъа умут этедиле.

Социал тёлеулени жангы жорукъла бла

Россейни Социал фонду пособияланы тёлеу жаны бла жангы жорукъланы тохташдыргъанды. Алай бла энди бир сабий пособие хар айны ючюнчюсюнде берилликди, аналыкъ капиталдан тёлеуле уа – бешинчисинде. Жыл бла жарымы толмагъан сабийге къарагъан ата-аналагъа ахча айны сегизинде келликди.

Тёлеуле почта бла бара эселе, ахча 1-25 кюнледе келирге боллукъду, кеси да почтаны ишлеген графигине кёре. Сабий туугъан ючюн бир кере берилген ахча эмда пособияны къайсы тюрлюсюню да биринчи тёлеую ол кезиуледе жетерикди. Жангы айда келген ахча аны аллында ай ючюндю.

Эсгертме жангыртылады

Уллу Ата журт урушну кезиуюнде ёлген аскерчилерибизге аталып Чегемде орнатылгъан эсгертмеге ремонт этип башлагъандыла. Районну жер-жерли администрациясындан билдиргенлерине кёре, шёндю анда эски конструкцияланы оюп кетере турадыла. Ызы бла подряд организацияны специалистлери мермер ташланы, Ёмюрлюкню оту жаннган чёмючню, жазыуланы жангыртырыкъдыла. Ишле Россейни Къоруулау министерствосуну энчи программасыны чеклеринде барадыла. Эсгертмени быйыл август айгъа дери жангыртып бошаргъа дейдиле.

Улбашланы Мурат хазырлагъанды.