Жаникаланы Алимат Каменка элни почтасында ишлегенли онтёртюнчю жыл барады.

Алимат Кичибалыкъда Топалланы Хаджи-Мусаны бла Налдюзню юйюрлеринде туугъанды. Мектепни бошагъандан сора, усталыкъ билимни тигиу жаны бла алгъанды, бу иш бла бир кесек заманны кюрешгенди. Юйдегили болгъандан сора Каменкада жашап башлагъанды.

Почтада ол адамланы бу жаны бла жумушларына къарайды, газетге жаздырыу ишге да къайгъырады. Белгилегенича, почтада бу ишге энчи эс бёлюнеди. Жарсыугъа, кёплени газетни багъасы сагъайтады. Алай, кеч къалып къалабыз, болжал бошалгъынчыгъа дери бизни «Заманнга» жаздырыгъыз дегенле да бардыла. Жууукълары чыкъгъан номерлени сурап келгенле да тюбейдиле, дейди ол.

- Алгъа почтальон болмагъаны ючюн газетни алгъанланы саны иги да азайгъан эди, бусагъатда аллай жарсыу жокъду. «Заманны» бир окъуп башлагъан аны артда да излейди, - дейди Алимат. - Газетибизни сакъларгъа керекбиз, ол миллетибизни энчилигин белгилеген шартладан бириди, тилибизни сакълауда уллу ишни тамамлайды, унутдурмайды, аны ёсе келген тёлюлеге тазалай ётдюрюрге онг береди. Айтхылыкъ ата-бабаларыбыз, шёндюгю тёлюлени жетишимли адамлары бла шагъырей этеди, аланы халкъгъа танытады. Мен кесим аны, журналларыбызны да алмай къалмайма, окъургъа уа бютюнда эрттегили хапарланы, адетле, маданият бла байламлы материалланы сюеме.  

Кульчаланы Зульфия.