«Россей 2014 жылда халкъла аралы гинасуу (ртуть) конвенциягъа къошулгъанды, 2020 жылдан башлап гинасуу термометрлени чыгъарыуну, сатыуну эм тышына элтиуню тохтатыргъа борчланы боюнуна алып, - деп хапарлайды «Интер-С Групп» фармдистрибьюторну директору Настасья Иванова. – Арт заманда аптекала аллай градусниклени къалып тургъанларын сатып бошагъандыла, алагъа багъала пандемияны кезиуюнде иги да бийик болгъандыла».

Бусагъатда аптекалада гинасуусуз, электрон эм инфракрасный термометрлени сатып алыргъа боллукъду. «Гинасуусуз градусникле санны иссилигин тюз кёргюзтедиле, алада галлийни мурдорунда ууландырмагъан металланы бирлешме эритилгенлери барды, - деп ангылатады Pharm-MedExpert.Ru порталны редактору Иван Данилов. – Электрон термометрлеге сылтаула чыгъарыкъ тюйюлдюле, ол белгили сатыу маркалы эсе, учуз къытай тюрлюсю болмагъанлай.  Термометрни къызыулукъну ёнчеленип бошалгъанын билдирген тауушундан сора аны чыгъарыргъа ашыгъыргъа керекмейди, дагъыда 1-2 минут тутаргъа тийишлиди, ол толусунлай тюз кёрюмдюлени белгилерча».

Врачлагъа не затны эм нек эркин этмей башлагъандыла?

Урунуу министерство медиклени урунууларын къоруулагъан жангы жорукъла чыгъаргъанды.  Терк болушлукъ тапдыргъан службаланы врачларына машинада ашаргъа, ичерге, жукъларгъа, медицина документациядан сора башха затланы окъургъа да эркинлик бериледи. Стационарда ишлеген медиклеге узун тырнакъла ёсдюрюрге, психиатрия эм наркология отделениялада тиширыу врачлагъа эр кишиле жатхан палаталада боюну терен ачылгъан ёрге жанла эм къысха этекле киерге жарамайды.

- Бу затладан асламысы алгъын да белгиленип эди. Ол санда психиатрия отделениялада къысха тёбен жанлагъа бла боюну терен ачылгъан кийимлеге тыйгъычла да, - дейди терк болушлукъ тапдыргъан службаны фельдшери Дмитрий Беляков. –  Ауузланыуну юсюнден айтханда уа, медик скорый машинада бир зат къаба бара эсе, аны башха заманда ашаргъа заманы болмагъаны туурады.

Адам танг атхынчы юйюнден чыгъады, артха уа жаланда ингирде сегизге къайтыргъа болады. Бизни ауузланыу низамыбызгъа контроль этгенден эсе, къуллукъчула бирси магъаналы жарсыулагъа эс бурсала иги боллукъ эди, сёз ючюн, скорыйледе бригадаланы жетишмегенлерине.

Федерал газетлени материалларына кёре Жангуразланы Нажабат хазырлагъанды.