Урваньны почтасында бюгюнлюкде тёрт адам урунадыла - эки почтальон Лида Жилетежева бла Майя Ивазова, оператор Индира Карданова эм почта бёлюмню башчысы Людмила Тхакахова. Ала иги кесек заманны ичинде, бир юйюрча, бир бирни ангылап, бир бирге сакъ болуп ишлейдиле.

Людмила Тхакахова билдиргеннге кёре, элде 70 чакълы бир таулу юйюр барды, аладан таулу газетни беш адам аладыла. «Газетни бир алып башлагъан, артда къоймайды, излейди. Бир элчибиз барды, тюз да почта келтирилгенлей, ашыгъып, газетни алады, окъуйду, сора бизге келип, къаллай сейир статья кёрдюм, деп хапарлайды. Алай башхалары уа тилни билмейбиз, малкъар тилде окъуялмайбыз, багъады деген сылтауланы санайдыла. Биз алагъа изданияланы магъаналылыкъларын юсюнден айтабыз, ангылатыргъа кюрешебиз. Хар инсан тилин билирге, ата-анала сабийлерин ёз тиллеринде сёлеширге юйретирге борчлудула, ансыз биз миллетча тас болуп кетерикбиз. Былайда къабарты, малкъар тилде газетле уллу болушлукъ этедиле», - дейди ол.

Кёп элледен биз жаздыргъанлыкъгъа почта газетни келтирмейди дегенча тарыгъыуланы эшитирге тюшеди. Алай Урваньда аллай жарсыу жокъду, почтальонла жумушларын тийишлисича тамамлайдыла. Багъаланы юслеринден айтханда, бир жанындан ала аз да кёрюнмейдиле, алай жарым жылны ичинде ёз тилингде чыкъгъан газетни алып окъур, тилинги байыкъландырыр, жангы зат билир ючюн, ол кёп тюйюлдю.  

Глобализация болумлада миллетлени энчиликлерин сакълауда  ана тилледе чыкъгъан газетлени, журналланы магъанасы бютюн ёседи. Халкъларыбызны айтхылыкъ адамларыны, тарыхыны эм бюгюнлюкде бола тургъан ишлени юслеринден билдиргенинден тышында, ала тилни ариулай-тазалай сакъларгъа себеплик этедиле. «Заманда» чыкъгъан кёп материалланы бир башха изданияда табар амал жокъду.

Кульчаланы Зульфия.