Озгъан жылда республиканы устазларыны къаууму «РФ-ни билим бериу сферасыны сыйлы ишчиси» деген даражалы ат бла саугъаланнганды. Аланы санында уа Къашхатауну Чеченланы Шамил атлы битеулю билим берген школундан Мокъаланы Зухура да барды.

Сагъынылгъан мектепде ол жаш тёлюню орус тилни бла литератураны жашырынлыкъларына, сейир темаларына юйретип келгенли уа энди аз къалып отуз жылгъа жууукълашханды. Анча заманны ичинде уа сынамлы педагог, окъуучулагъа билим бере, кеси да ишчи тенглерини арасында юлгюлю бола, жетишимле да болдургъанлай келеди.

Сёз ючюн, Зухура Докаевнаны 2020-2021 жылда окъутхан онбиринчи классы школну бошагъанда орус тилден Бир къырал экзаменде кёргюзтген жетишимле махтаугъа, ыспасха да тийишлидиле. Нек дегенде жаланда бу мектепде угъай, саулай да Черек районда окъуна эндиге дери да сынаула ЕГЭ халда берилип башлагъанлы алыкъа бу предметден жюз балл алгъан чыкъмагъан эди.

Алай бла окъуучусу Муртазланы Амина, орус тилден экзаменде жюз баллгъа тийишли болуп, школну коллективин, ата-анасын да къууандыргъан эди. Ол бюгюнлюкде кесибизни университетде экономистге окъуйду.

Каркаланы Рамазан бла Чочайланы Мухаммат да токъсандан аслам балла алгъандыла. Карка улу Санкт-Петербургда Тау къырал университетде «электроника эмда электроэнергетика» деген ызда билим ала турады. Чочайланы жашлары уа КъМКъУ-ну студентиди. Дагъыда Джамиля Кораблёва (анасы таулуду) да токъсан баллдан аслам алгъанланы санындады. Ол да университетибизде окъуйду.

Сагъынылгъан выпускда угъай да, хар жолдан, окъуулу устазны онбиринчи классы болса, ала бирсилени арасында айырмалы болмай къалмайдыла. Аны алайлыгъын коллегалары, ата-анала, сабийле кеслери да биледиле эмда кёредиле. Быйыл да ол тогъузунчугъа бла онбиринчиге жюрюгенлеге орус тилден бла литературадан дерсле береди эмда ала да жетишимлери бла къууандырырла деп ышанады.

Не тюрлю ишде да жетишимли болур ючюн а заманны, билимни да аямай кюреширге кереклиси белгилиди. Зухура Докаевна да, ол окъутхан сабийле ЕГЭ-леге тынгылы хазырланыр ючюн бюгюнлюкде билим бериуде болгъан ышаннгылы амалланы бла мадарланы хайырланады. Дерслеринде сынаула бла байламлы аслам затха тюшюндюргенинден тышында да, кружокланы, факультативлени, электив курсланы бардырады. Алагъа хар сабийни да жюрюрге онглары барды эмда анда тинтирге излеген темаларыны юсюнден соруула бередиле.

Сынамлы устазны билимини, окъуулулугъуну даражасын ангылагъанла, кёргенле уа аланы ЕГЭ-леге ол хазырласа излейдиле, аны усталыгъын чертедиле. Ол а аланы жаланда дерсге, экзаменлеге керекли затлагъа тюшюндюрюп къоймай, ахшы инсанла, халкъларына жарагъан, кеслерини жолларын тапхан адамла болургъа юйретеди. Окъуучулары да аны ол ахшылыгъын, адамлыкъ ышанларын унутмайдыла. Школну бошагъанларындан сора да, хар байрамдан аны жокъламай, кёлюн кётюрмей, ыразылыкъларын айтмай къоймайдыла. Аланы бу къылыкълары ючюн а устаз кеси да: «Сау болсунла, адамлыкълары, халаллыкълары ючюн да», - дейди.

Кеси да орус литератураны, тарых магъаналы чыгъармаланы гитчелигинден да сюйгенди. Айхай да, хар неге да сюймеклиг а юйюрден башланады. Атасы айтыучу сейир-тамаша жомакъланы да эсинде тутады. Ол а шаркъ поэтлени назмуларын, поэмаларыны юзюклерин кёлюнден окъуна окъугъанды.

Школда кезиуюнде уа устаз Чочуйланы Лиза Магометовнаны орус фольклордан берген дерслерини терен магъаналы, сабий сюйюп тынгыларча сейир, ангылашыныулу да болуучуларын белгилейди. Дагъыда тамата класслада окъутхан Асанланы Елизавета Каммоевнаны асыл къылыкълы, ариу адам болгъаны бла бирча жаш тёлюню кесине тынгылата, окъууну, жашауну да магъанасына тюшюндюре билгенин да чертеди.

Айхай да, сынамлы устазны бош заманы да аз къалады. Ол аны да асламысында окъутууда жангычылыкълагъа, шёндюгюлю амаллагъа бла онглагъа тюшюнюуге хайырланады. Не жаны бла да окъутханлары терен эмда тынгылы билим алырларына, аны школдан арысында да хайырланалырларына къайгъырады. Нек дегенде, белгилисича, орус тил – ол мектеплени тауусханла аслам эмда борчлу халда берирге тийишли сынауду.

Ол дагъыда огъурлу анады эмда ыннады. Марина Дондагъы Ростовда къырал медицина университетни бошап, Москвада Онкологияны Блохин атлы илму-тинтиу арасында врач болуп ишлей, саусузладан ыразылыкъ табады. Карина да сагъынылгъан шахарда юристлени хазырлагъан университетде билим алгъанды. Бюгюнлюкде усталыгъына кёре ишлейди эмда жетишимлиди.

Юйюрню ийнагъы уа туудукъчугъуду. Ынна да, анга дагъыда къошулур деген ахшы умутун жюрегинде сакълай, жашаугъа, къадаргъа да шукур этеди.

Окъуучуланы жетишимлери, билим даражалары да окъутхан устазларыны иш кёллюлюклерин толусунлай ачыкълагъанларына ийнана, аланы алларында жууаплылыкъны сезе, хар дерсине да, школда бюгюн ишлеп башлагъанча, тынгысыз халда хазырланады.

Трамланы Зухура.