РАДИО ЦIЭРЫIУЭМ И ВАГЪУЭХЭР

«ТIэкIу укъыкIэрыхуащ, Залинэ, дэ ар зэрытлъагъурэ куэд щIащ» - къызжезыIэни щыIэнщ си къалэмыр къызыхуэсщтар къыщащIэкIэ. Ар иджыблагъэ сызрихьэлIэу сызэплъа, Москва щекIуэкIа «Черкес ФМ-м и ­вагъуэхэр» зи фIэщыгъэ концерт инырщ икIи дахащэрщ. Дыщыгъуа­зэщ КъБР-м щIыхь зиIэ и артист Хьэцей Тимур илъэс зыбжанэ ипэкIэ «Черкес FM» зи фIэщыгъэ, дунейм и плIанэпэ псоми щызэхах радио къы­зэрызэIуихам. Абы макъ телъыджэ зиIэ артистхэмрэ купщIэ зыщIэлъ уэрэдхэмрэ (макъамэхэмрэ) фIэкIа къызэримытри бзыщIакъым. АтIэ а радиом зи макъ щызэхэтххэм ящыщу фIым я нэхъыфIыжхэрат концертым лъабжьэ хуэхъуар. 

Адыгэ Республикэм уэрэдымрэ ­къафэмкIэ и «Ислъэмей» къэрал ансамблым и артистхэм «Сабиигъуэ жы­жьэм и ежьухэр» макъамэ телъыджэмкIэ къызэIуаха концертышхуэр ирагъэ­кIуэкIащ режиссёр Гумэ Маринэрэ ­Урысей телевиденэм и лэжьакIуэ цIэ­рыIуэ Березин Владимиррэ. Iуэху дахэр зи жэрдэмыр, абы и къызэгъэпэща­кIуэр Хьэцейращ. 
Концертхэмрэ гъэлъэгъуэныгъэхэм­рэ утетхыхьыныр сфIэтыншкъым, сыту жыпIэмэ абыхэм къуат гурыщIэр, уи псэм къыщагъэуш гукъыдэжыр, гуш­хуэныгъэр, нэгъуэщIхэри псалъэкIэ къэпIуэтэныр гугъущ. Урысми жиIакъэ: «Щэ зэхэпх нэхърэ - зэ плъагъу». Слъэ­гъуамрэ зэхэсхамрэ лъэныкъуэегъэз сщIыныр си мымурадми, и гущIыIу къысфIэхъур абы сызэрызэщIиIэтарщ, ХьэIупэ ДжэбрэIили жиIауэ, «си щхъуэ­фэцыр къызэригъэтэджарщ, си щIы­фэр зэригъэтхытхарщ». Иджы япэу ­тлъагъуу, зэхэтхыу аракъым артист цIэрыIуэхэм я уэрэд жыIэкIэр, атIэми ахэр зыр адрейм кIэлъыкIуэу, уардэу ­за­Iыгърэ дахэу хуэпауэ, утыкум къы­щихьэкIэ, гуфIэгъуэм укъытреIэтыкI. Ар дауэ, апхуэдиз къару зыщIэлъ адыгэ лъэпкъыр мащIэу, абы къыхэкIыуи ­гуащIэмащIэу?! Пэжкъым, пэжынкIи ­Iэмал иIэкъым. 
Москва щыпсэу адыгэхэм я нэхъыжь­хэм я советым и тхьэмадэ Агъырбэ Юрэ къэпсэлъапIэр хуит щыхуащIым жиIащ: 
- Иджыпстурей зэманым, псом хуэ­мыдэжу дэ нэхъыжьхэр, дыхуэныкъуэщ цIыхугъэм, гуапагъэм, лъытэныгъэм. Дунейм щынэхъ лъапIэ дыдэр цIыхум и псэ хуабагъэращи, ар хыдолъагъуэ тфIэфIу дызэдаIуэ цIыхубэ уэрэдхэм, лъэр щIэзыгъэкI къафэхэм. Нобэ ди ­нэгу щIэкIыр абы и зы Iыхьэщи, мы Iуэху дахэр зи гукъэкIхэм, хэлIыфIы­хьахэм дяпэкIи ехъулIэныгъэ яIэну ди гуапэщ. Нэхъыжьхэм я советым ди къыхуеджэныгъэр мыращ: «Дытхьэу­сыхэн­къым, зыри ди жагъуэ тщIынкъым, зыми зыхуэдгъэгусэнкъым, гъащIэр фIыуэ тлъагъунщ». Абы дытевгъэт псори. 
Пшыхьым и япэ дакъикъэхэм къы­щыщIэдзауэ уи гур зы гуфIэгъуэ гуэ­рым къыдрешей. Артистхэр къыздрашэ ­утыкум и дахагъэр, «Черкес FM» радиом и дамыгъэу ягъэувар гъуазджэм ­хуащIа хэлъхьэныгъэм папщIэ абыхэм ящыщхэм зэрыратыр, уэрэд нэщIы­сахэр, адыгэ лъэпкъыр зыгъэлъапIэ псалъэхэр зэригъэщIагъуэр Березиным и нэгум къызэрибджыкIыр… куэд мэхъу ар. 
Артистхэу Алтан Гюльджан (Тыркум щыпсэу ди лъэпкъэгъухэм ящыщщ), Третьяк Татьянэ, Каримов Ринат сымэ гъэхуауэ адыгэбзэкIэ уэрэд щыжаIэм си нэпсыр къысфIекIуащ: иужьреитIыр адыгэкъым, ауэ адыгэбзэм и IэфIыр, и дахагъэр мыбыхэм зыхащIащ?! Тут Заур и макъ лъэщыр-щэ?! Хэщыпы­хьауэ къыхэха уэрэдхэмрэ ахэр зыгъэзащIэ щIалэгъуалэ дахэмрэ сыздеплъым, «Зэ уадыгэну сыт и уасэ?» псалъэ шэрыуэхэр си гум, си псэм иджыри зэ пхыкIащ, концерт къызэгъэпэщыкIэм сыт и лъэ­ныкъуэкIи хуэIэкIуэлъакIуэ цIыхухэм си щхьэр лъагэу сагъэлъагъужащ. 
Пэшым щIэсхэм гулъытэ щхьэхуэ ­къалэжь. Москва щыпсэухэм я закъуэкъым абы зрезыгъэхьэлIар, адыгэхэр щыпсэу зэкъуэш республикищми икIахэр мымащIэу щIэст абы, ялъагъум хьэщыкъ зэрищIар я нэгум къищу. Уэрэд цIэрыIуэхэм дежьууэ, макъамэ дахэхэм къэтэджрэ къыдэфэу. Нэхъыжьхэми нэхъыщIэхэми, артистхэми абыхэм я гуащIэм дихьэххэми, кон­цертыр къызэгъэпэщыным хэлIыфIы­хьахэми Iуэхум гурэ псэкIэ IущIахэми фIыщIэшхуэ яхуищIащ Хьэцей Тимур. Концертыр зэхуащIыжащ Тхьэбысым Умар «Дэ адыгэм ди хабзэр аращ» и уэрэд цIэрыIуэмкIэ, пшыхьым хэта артист псоми зэдыжаIэу. 
«Черкес ФМ-м и вагъуэхэр» концертыр щIэх-щIэхыурэ зэхашэу хабзэ ­ящIыну къызэгъэпэщакIуэхэм зэрамурадыр абы щыжаIати, си щхьэкIэ сы­щыгуфIыкIащ. Апхуэдэ концерт адыгэ­хэр щыпсэу ди щIыналъэхэми нэгъуэщI къэралхэми щыбгъэлъэгъуэну узы­темыукIытыхьынщ. 
 

ИСТЭПАН Залинэ.

Поделиться:

ЧИТАТЬ ТАКЖЕ:

07.12.2023 - 09:25

IЭФIУ, КЪЭУАТУ ЩIАКХЪУЭ

ЗэрыхуагъэфащэмкIэ, Пасэрей Мысырым щIакхъуэ щагъажьэу щIадзащ ди эрэм и пэкIэ 5-нэ лIэщIыгъуэм.

07.12.2023 - 08:10

АЗЭПЩ И КЪУЭ ГЪУДЭБЕРД И УЭРЭДЫМРЭ И ХЪЫБАРЫМРЭ

Къэбэрдейм «уей-уей» жрагъэIэу исахэм ящыщщ Азэпщхэ. Лъэпкъ мащIэми, гу зыкIуэцIылъ, Хэкум щхьэкIэ зи псэр зытыну хьэзыр лъэпкъыфIхэм языхэзт. Абыхэм ящыщщ Гъудэберд жыхуаIэр.

07.12.2023 - 07:51

ЧЕМПИОНАТЫМ И ЕТIУАНЭ МЕДАЛЬ

Азербайджаным и къалащхьэ Баку иджыблагъэ щекIуэкIащ дзэм къулыкъу щызыщIэхэм спорт бэнэкIэ лIэужьыгъуэхэмкIэ я 36-нэ дунейпсо чемпионат. Абы щызэпеуащ къэрал 18-м я спортсмен 200-м щIигъу.

07.12.2023 - 07:51

МАЙ ЩIЫНАЛЪЭМ ГЪУЭГУХЭР ЩЫЗЭРАГЪЭПЭЩЫЖ

«ГъуэгуфI шынагъуэншэхэр» лъэпкъ пэхуэщIэм (проектым) и фIыгъэкIэ 2023 гъэм Май щIыналъэм Iуэхугъуэ хъарзынэхэр щызэфIагъэкIащ.

06.12.2023 - 15:34

АХЪШЭ ЩIЫХУЭМ ХОХЪУЭ

2023 гъэм жэпуэгъуэм и 1-м ирихьэлIэу республикэм и цIыхухэм банкхэм къыIаха кредитым и куэдагъыр псори зэхэту сом мелард 88,5-рэ хъуащ.