«ГъуэгуфI шынагъуэншэхэр» пэхуэщIэм хиубыдэу мы зэманым лэжьыгъэшхуэхэр иращIылIэ Шэрэдж псым телъ лъэмыжым. Ар и лъабжьэм къыщыщIэдзауэ къагъэ­щIэ­рэщIэж, къэухьхэри, лъэмыжыр зыIыгъ лъащIэхэри, лъэс зекIуапIэхэри хиубыдэу.

Куэд зэрыщыгъуазэщи, лъэмыжыр зытелъ къэрал ­гъуэгу нэхъыщхьэм зы махуэм къриубыдэу хьэлъэзешэ маши­нэрэ транспорт зэмылIэужьыгъуэу мин бжыгъэхэр щызэблокI. Аращ Къэбэрдей-Балъкъэрым и лъэмыж нэхъ инхэм хабжэр зыхуей хуэзэу зэрагъэпэщыжын хуей щIэхъуар. Дагъыстэным къыщыщIэдзауэ Осетие Ищхъэрэ - АланиемкIэ иухыжу, гъу­нэгъу щIыналъэхэм дапызыщIэри а гъуэгурщ.
Лэжьыгъэхэр псынщIэу йокIуэкI. Транспортыр а щIыпIэм щызэтримыхьэн папщIэ псым пIалъэкIэ тралъхьа лъэмыжыр сэбэпышхуэ мэхъу. 
Апхуэдэ лэжьыгъэхэм иджыпсту щыпащэ Прохладнэ - Iуащ­хьэмахуэ гъуэгум хуэзэу Бахъсэн псым телъ лъэмыжми. Мы гъуэгум зэпещIэ Бахъсэнрэ Дыгулыбгъуейрэ, Бахъсэнрэ Налшыкрэ. Иджыпсту ухуакIуэхэм зэрахъуэкI сэкъат зыгъуэта ­гъуэгу зэпыхьэпIэхэр, сыту жыпIэмэ, абы куэдкIэ елъытащ лъэ­мыжыр зэрызекIуэну пIалъэмрэ и шынагъуэншагъэмрэ.
Мы зэманым ирихьэлIэу лъэмыжым бетонхэр тралъхьащ, лъэс зекIуапIэмрэ гъуэгумрэ зэпэщIэзых къэухьхэр ягъэуври, асфальт тралъхьэжащ, лъэмыж зэпрыкIыпIэхэр къагъэнэ­хуащ. Абыхэм къакIэлъыкIуэу гъуэгум асфальтыр тIуащIэу тралъхьэнурэ и бгъуитIым иджырей къэухьхэр ягъэувынущ, гъуэгу дамыгъэхэр тращIэнущ.
Лэжьыгъэ псори мы гъэмахуэм къриубыдэу зэфIагъэкIынущ.
Лъостэн  Музэ.