«Узыншагъэр хъумэн» лъэпкъ проектымкIэ ди республикэм къыIэрыхьащ «Гранта» автомобилу 19. Ахэр иратынущ республикэм и райони 7-м хыхьэ къуа­жэхэм щыIэ медицинэ IуэхущIапIэхэм.

Машинэхэр къагъэсэбэ­пы­нущ пIалъэ къыхэмыкIыу дэIэпыкъуныгъэ хуэныкъуэ сы­маджэхэм я унэм участковэ дохутырхэр щыкIуэкIэ. Ап­хуэдэуи а автомобилхэмкIэ республикэм и къуажэ пхы-дзахэм щыпсэухэу зи узыншагъэм нэхъ куууэ кIэлъыгъэп­лъыпхъэхэр район сымаджэщхэм ирагъэшэнущ. 
Прохладнэ районым и медицинэ IуэхущIапIэхэм иратынущ автомобили 3, Дзэлы­къуэ, Тэрч районхэм - автотранспорту 4, Аруан, Бахъсэн районхэм - щырыщ, Шэджэм, Шэрэдж куейхэм - машинэ зырыз.
«Узыншагъэ» лъэпкъ проектым и фIыгъэкIэ республикэм и районхэм щыIэ медицинэ IуэхущIапIэхэр автотранспортхэмкIэ хъарзынэу къызэгъэпэща мэхъу. Ап­хуэ­дэу 2020 гъэ лъандэрэ щIыналъэм и медицинэ IэнатIэ­хэм щхьэкIэ къаIэрыхьащ автомобиль 60, 2025 гъэ пщIондэ иджыри машинэ 34-рэ къа­щэхуну я мурадщ.

ЩхьэщэмыщI  Изэ.