Мэлбахъуэ Тимборэ и цIэр зезыхьэ Лъэпкъ къэрал библиотекэм Славян тхыбзэмрэ щэнхабзэмрэ я махуэм, накъыгъэм и 24-м, щекIуэкIащ зэхыхьэ гуапэ. Ар къызэригъэпэщащ КъБР-м Лъэпкъ Iуэхухэмрэ жылагъуэ проектхэмкIэ и министерствэм, КъБР-м и Лъэпкъ библиотекэр и дэIэпыкъуэгъуу.
ЗэIущIэм ирагъэблэгъащ КъБР-м лъэпкъ Iуэхухэмрэ жылагъуэ проектхэмкIэ и министрым и къуэдзэ Гергоков Джамбулэт, КъБР-м и Парламентым ЕгъэджэныгъэмкIэ и комитетым и унафэщI Емуз Нинэ, КъБР-м ЕгъэджэныгъэмкIэ и министерствэм и управленэм и унафэщI Мыз Маринэ, КъБР-м и Iэтащхьэм и деж щыIэ Советым хэт, «Память в наследство» жылагъуэ зэгухьэныгъэм и унафэщI, УФ-м и ТхакIуэхэм, и Журналистхэм я зэгухьэныгъэхэм хэт, тхылъ тедзапIэм и унафэщI, тхакIуэ, лъахэхутэ цIэрыIуэ Котляровэ Марие, Урыс тхыдэмрэ щэнхабзэмрэ я «Вече» жылагъуэ зэгухьэныгъэм и унафэщI Ситниковэ Людмилэ, КъБР-м ис муслъымэнхэм я дин IуэхущIапIэм и унафэщIым и дэIэпыкъуэгъу Амщыкъуэ Анжелэ, Налшык и благочиннэм и лIыкIуэ Осипов Константин, жылагъуэ, дин зэгухьэныгъэхэм, лъэпкъ щэнхабзэ центрхэм щыщхэр, еджакIуэхэр, студентхэр.
Библиотекэм и лэжьакIуэхэм тхылъ дапхъэ къызэрагъэпэщащ, IуэхущIапIэм и фондым и гъэтIылъыгъэ нэхъ гъэщIэгъуэну къалъытэхэр къызэщIиубыдэу. Зэхыхьэм зыкърезыгъэхьэлIахэм, псом хуэмыдэу щIалэгъуалэм, зыхагъэгъуэзащ а тхылъхэм.
Зэхыхьэр щыщIидзэм, къэрал махуэшхуэм и тхыдэм, ар гъэлъэпIэным щIэдзапIэ хуэхъуам ухэзыгъэгъуазэ видео ягъэлъэгъуащ. Абы къыщыгъэлъэгъуащ махуэшхуэр славян тхыбзэм и лъабжьэр зыгъэтIылъа узэщIакIуэхэу, чыристан диныр цIыхухэм яхэзыхьа щихъ зэкъуэшхэу Кириллрэ Мефодийрэ я цIэм зэрепхар. Абыхэм алыфбейр зэрызэхагъэувам и мызакъуэу, инджылыз ущиехэр, псысэхэр, тхьэлъэIу тхыгъэхэр зэрадзэкIащ. Зэкъуэшхэм зэхалъхьа славян тхыбзэм и алыфбейрщ нобэр къыздэсым къэдгъэсэбэпыр. Абы и цIэр - кириллицэр - Кирилл и цIэм къытехъукIащ. Япэу ар ягъэлъэпIэн щыщIадзар Болгариеращ. Урыс Члисэм и жэрдэмкIэ, щихъ зэкъуэшхэу Кириллрэ Мефодийрэ я фэеплъ махуэр 1863-м щыщIэдзауэ ягъэлъапIэ. Урысейм а махуэр члисэ-къэрал махуэшхуэу къыщащтащ икIи абы ирихьэлIэу конференцэхэр, славян къеджэныгъэхэр, концертхэр, гъэлъэгъуэныгъэхэр, тхьэлъэIухэр ирагъэкIуэкI.
Къызэхуэсахэм псалъэ гуапэкIэ захуигъэзащ Лъэпкъ библиотекэм щеджэ и пэшым и унафэщI Нанэ Ларисэ. Абы жиIащ илъэс етхуанэ хъуауэ я IуэхущIапIэм мы зэIущIэ щхьэпэр къызэрыщызэрагъэпэщыр, лъэпкъ зэмылIэужьыгъуэхэм къыхэкIахэр нэхъри зэкъуэувэным къыхуезыджэр. Зэхыхьэр къыхэзылъхьахэм я къалэн нэхъыщхьэу абы къигъэлъэгъуащ республикэм щыпсэу лъэпкъхэм я зэхущытыкIэхэр егъэфIэкIуэныр, урысыбзэр хъума, лъэпкъ зэмылIэужьыгъуэхэм щыщхэр абы иризэгурыIуэу къагъэсэбэпыныр.
Гергоков Джамбулэт Къэбэрдей-Балъкъэрым щыпсэу лъэпкъхэм щыщ дэтхэнэри къыхуриджащ я щэнхабзэм, тхыдэм зрагъэужьыну, лъапIэныгъэхэр ялъытэну, гъунэгъу лъэпкъхэм къахэкIахэм пщIэ, ныбжьэгъугъэ яку дэлъыну.
- Мы зэманым къухьэпIэр хущIокъу урысыбзэр, урыс щэнхабзэр, Урысейм и тхыдэр игъэкIуэдыну. Абы зэрытхузэфIэкIкIэ дыпэщIэтын хуейщ, ди лъэпкъ тхыдэмрэ ди пщэдеймрэ къыгуэхыпIэ имыIэу зэпыщIащи, - жиIащ Гергоковым.
Емуз Нинэ и псалъэм къыхигъэщащ лIэщIыгъуэ 12 хъуауэ ягъэлъапIэ махуэшхуэм мыхьэнэ зэриIэр. Абы ягу къигъэкIыжащ щIэныгъэлI, композитор цIэрыIуэхэр урысыбзэкIэ псалъэу, абы ирилажьэу зэрыщытар, урыс щIэныгъэмрэ щэнхабзэмрэ я лъабжьэр гъэтIылъыным хэлъхьэныгъэ ин зэрыхуащIар. Абы щIэблэр къыхуриджащ библиотекэм щIэх-щIэхыурэ кIуэну, пэжымрэ пцIымрэ зэхагъэкIыфын, хъыбар нэпцIхэм зыщахъумэн папщIэ тхыдэр яджыну, япэ итахэм я лэжьыгъэфIу къэралыр зэрыгушхуэхэм иджыри къыпащэну, я лъэпкъыбзэр, щэнхабзэр яхъумэну, ирагъэфIэкIуэну.
Ситниковэ Людмилэ тепсэлъыхьащ зэкъуэшхэу Кириллрэ Мефодийрэ славян тхыбзэм хуащIа хэлъхьэныгъэхэм, абыхэм урыс алыфбейр къызэрызэрагъэпэщам, я щIэинхэм.
Амщыкъуэ Анжелэ къытеувыIащ Къэбэрдей-Балъкъэрым щыпсэухэм, я лъэпкъ щэнхабзэм къыдэкIуэу, нэгъуэщI лъэпкъхэм я щэнхабзэми зыхагъэгъуэзэн зэрыхуейм, щIыналъэм зрагъэужьынымкIэ, мамыру дыпсэунымкIэ ар щIэгъэкъуэн зэрыхъунум.
Зэхыхьэм къыщыпсэлъахэм нэхъыщхьэу къыхагъэщащ Кавказ Ищхъэрэм ис лъэпкъхэм я тхыбзэр зэфIэувэнымкIэ кириллицэм мыхьэнэшхуэ зэриIар, урысыбзэм лъэпкъ куэд зэрызэкъуигъэувэр. ЩIалэгъуалэр къыхураджащ урыс, лъэпкъ тхыбзэхэм я хабзэхэр, тхыдэр яхъумэну, я щIэныгъэм хагъэхъуэну, ехъулIэныгъэхэр зыIэрагъэхьэну. КъБР-м Лъэпкъ Iуэхухэмрэ жылагъуэ проектхэмкIэ и министерствэм зэIущIэм хэтахэм тхылъхэр тыгъэ яхуищIащ.
Славян тхыбзэмрэ щэнхабзэмрэ я махуэр республикэм и къалэхэмрэ районхэмри щагъэлъэпIащ, пшыхь гъэщIэгъуэнхэр, концертхэр зэхашэри. Къапщтэмэ, Мечиев Кязим и цIэр зезыхьэ НыбжьыщIэхэм я библиотекэм къыщызэрагъэпэщащ «От первых букв до библиотек», «Откуда пошла грамота на Руси», «Что мы знаем о славянской письменности?» зэхыхьэхэр. ПащIэ Бэч-мырзэ и цIэр зезыхьэ республикэ Сабий библиотекэми ныбжьыщIэхэм папщIэ зэхыхьэ щIэщыгъуэ щрагъэкIуэкIащ. Темыркъан Борис и цIэр зезыхьэ къэрал филармонием и симфоние оркестрым концерт щитащ «Налшык» санаторэм. КъБР-м и Лъэпкъ музейм, Вовчок Маркэ и цIэр зезыхьэ музейм, ди щIыналъэм и тхыдэ-лъахэхутэ музейхэм декоративно-прикладной гъуазджэм и IэпщIэлъапщIэхэм я лэжьыгъэхэр щагъэлъагъуэ.
ТЕКIУЖЬ Заретэ.
Сурэтхэр
Къарей Элинэ трихащ.