Иджыблагъэ адыгэ бзылъхугъэ Пекъу Алинэ дуней псом и бгы нэхъ лъагэ дыдэм дэкIащ. Ар Эверест и щыгум ихьащ къызыхэкIа лъэпкъым и щIыхькIэ, и зэфIэкIыр триухуащ адыгэм ди Щыгъуэ-щIэж махуэм. Ныпыр зыхуиIэтари мамырыгъэрщ. 

«Накъыгъэм и 18-м, сыхьэти 3-рэ дакъикъэ 35-м сэ Эверест и щыгум сытетт… Нэхъ лъагэу сыдэкIуеиху, нэхъри сыпIейтейрт. Зэгуэрым сурэткIэ слъэгъуа теплъэхэм иджы саIущIэпат. Мес, Хиллари - уэсымрэ мылымрэ къыхэщIыкIа сыджыр! Си нэгум телъыджэ зэрыщIэкIыр щызы­хэсщIэкIэ, жьыр къыспеубыд, гуфIэгъуэ нэпсыр си нэхэм къащIоувэ, нэхъри зысIэтыну ­къару къысхохьэ! СигукIэ тхьэ солъэIу щыгум сыкъыщыхутэныр къызэхъулIэну… Сынэсащ! Эверест и щыгум щызоIэтыр си лъэпкъ ныпыр! Накъыгъэм и 21-м илъэси 159-рэ ирикъуащ ди тхыдэм къриубыдэ зауэ нэхъ гущIэгъуншэ дыдэр зэри­ухрэ. А махуэм дигу къыдогъэкIыж адыгэ лъэпкъым и дежкIэ гъэунэхуныгъэ шы­нагъуэ хъуа, XIX лIэщIыгъуэм щыIа зауэжьыр, абы кърикIуахэр.
Тхыдэм и напэкIуэцI шынагъуэхэм дроплъэжри, дэ нэхъри зыхыдощIэ мамырыгъэмрэ зэгурыIуэныгъэмрэ зэрылъапIэр», - щетх бзылъхугъэм и Инстаграмм напэкIуэцIым. 
Иджыри мазэ ипэкIэ, Алинэ нэгъуэщI къэралхэм я спортсменхэр зыхэт гупым я гъусэу Непалым щыIэ Аннапурнэ бгым и щыгум дэкIащ. Ар дуней псом и альпинист  нэхъ жан дыдэхэм егъэлеяуэ къайгугъуэкIхэм ящыщщ, нэпкъ шынагъуэхэр къызэбнэкIынуи псэзэпылъхьэпIэщ. 

ГУГЪУЭТ  Заремэ.