Тэрч щIыналъэм щыщ сурэтыщI ­Къандрокъуэ Хъусен и Iэдакъэ­щIэкI­хэм я гъэлъэгъуэныгъэ иджы­благъэ щекIуэкIащ Нарткъалэ Сабий гъуаз­джэ­хэмкIэ и «Радуга» школым.

СурэтыщI щIалэщIэм дежкIэ япэ гъэ­лъэгъуэныгъэм мыхьэнэшхуэ иIэщ. Зэ­рыжаIэщи, Iуэхур зэребгъажьэщ.
Гъэлъэгъуэныгъэр къызэIуихащ школым и унафэщI Къардэн Равидэ. Ар ­Къандрокъуэ Хъусен и лэжьыгъэхэм щытхъуа, езым къызэрилъытэмкIэ абыхэм яхэлъ фIагъым, щIагъыбзэм я гугъу ищIа иужькIэ, апхуэдэ лъэбакъуэ дахэкIэ гъуазджэм и дунейм хэбэкъуа щIалэм ехъуэхъуащ ехъулIэныгъэрэ зыу­жьыныгъэрэ щымы­щIэну. СурэтыщIым и анэ Альбинэ (выс­тавкэм кърагъэблэгъат) и къуэм и зэ­фIэкIым зэрызригъэужьам, зэ­радэIэпыкъуам папщIэ фIы­щIэ хуищIащ къэпсалъэм.
Хъусен и IэдакъэщIэкIхэм ятеухуауэ а зэхыхьэм къыщыпсэлъащ усакIуэ, драматург «Горянка» газетым и редактор нэхъыщхьэ Къаныкъуэ Заринэ.
Къандрокъуэм и лэжьыгъэхэр нэ­гъуэщIхэм къахэзыгъэщщ плъыфэ зэ­хэлъхьэкIэр, абыхэм ящIэлъ гупсысэ гъэщIэгъуэнхэр. Зэ еплъыгъуэкIи нэ­рылъагъущ яхэлъ псэ хуабагъыр, лъа­гъуныгъэр, гурыфIыгъуэр.
Хъусен къыщыпсалъэм фIыщIэ ­хуищIащ гъэлъэгъуэныгъэр щигъэ­хьэзырым къыдэIэпыкъуа егъэджа­кIуэхэм, школакIуэхэм, Аруан щIыналъэм и цIыхубзхэм я зэгухьэныгъэм и унафэщI Хьэпэ Залинэ сымэ.
Гъэлъэгъуэныгъэм зыкърагъэхьэлIат сурэтыщIым и благъэхэм, Iыхьлыхэм, абы къыдеджахэмрэ и ныбжьэгъухэмрэ. ЩIалэм и зэфIэкI хигъахъуэу ипэкIэ кIуэтэну ехъуэхъуащ ахэр.
Тэрчокъуэ  Дисэ.