Гъатхэмрэ гъэмахуэмрэ ди щIыналъэм щизых пцIащхъуэ цIыкIухэр къэ­лъэтэжыным къэнэжа щIагъуэ щыIэкъым. Я бзэрабзэ макъымкIэ дунейр ягъэдахэу, пцIащ­хъуэ кIэдыкъуакъуэхэр унэ щIыхьэпIэхэм, гуэщ­хэм я бжыкъухэм къытетIысхьэнущ, япэ махуэхэм щIадзэнурэ къращIэкIынущ я абгъуэхэри.

Апхуэдэу ахэр нобэм къэс къыддекIуэкIащ, ауэ иужьрей илъэсхэм зэуэ зихъуэжащ щытыкIэм; дэнэ­кIи зыщыплъыхьи, плъа­гъур хьэпцIащхъуэхэрщ. Ахэр зэрызехьэрэ зэщIэфиеу къуажэ пщIантIэхэм зэрыдохьэри, ипщхьэпIэ зэв цIыкIу фIэкIа зимыIэ абгъуэ хъуреябзэхэр щхьэгъубжэ блыпкъхэм кIэщIащIыхь, зэрыпхуIугъэщти щымыIэу. ЗэрыфщIэщи, пцIащхъуэ кIэдыкъуакъуэ­хэм я абгъуэхэр ятIэмрэ хьэуазэ шхийхэмрэ Iэбы­дэлъэбыдэу къыхащIыкI. ХьэпцIащхъуэхэм ятIэ къудей мыхъумэ, нэгъуэщI зыри халъхьэркъым, аращ уэшхым тыншу къыщIрилъэсэхри. Ахэр нэхъыбэ къохъу, мыдрей кIэдыкъуа­къуэ цIыкIухэм я бжыгъэм нэрылъагъуу хощI.
А пцIащхъуэ лIэужьы­гъуэхэр зэхэмызагъэуи гу лъыптэркъым, арщхьэкIэ зэхуэхамэгу-хамащхьэщ. Языныкъуэ щIэныгъэлIхэм зэрыжаIэмкIэ, хьэпцIащхъуэхэм я псэупIэр хым пэмыжыжьэ къырхэрщ, къалэ кIуэцIхэрщ. Иужьрей зэманым ахэр къуажэхэм нэхъ кIуэ щIэхъуам и щхьэусыгъуэу къалъытэ къалэ кIуэцIхэм щекIуэкI ухуэныгъэ инхэр, жьы къабзэ зэрыдэмытыр, щIыуэ­псым игъуэт зэхъуэкIыныгъэхэр. ПцIащхъуэ кIэдыкъуакъуэхэр нэхъ мащIэ хъуауэ жаIэркъым, хьэп­цIащхъуэхэр къащытезэ­рыхьым деж нэхъ лъэныкъуэ зрагъэзу хуагъэфащэу аркъудейщ. Ахэр я­ ­теплъэкIэ зэщхь пэтми, бзу лIэужьыгъуэ зырызущ къызэралъытэри. КIэдыкъуакъуэхэр къуажэ гъащIэм ещхьу щымщ, зэрызехьэуи, къызэрехьэкIыуи плъагъуркъым икIи ахэр зыкIи ебгъапщэ хъунукъым къырхэмрэ къалэхэмрэ я щIыуэпсым и ­хабзэ ткIийм тету псэу къуа­лэбзухэм. 
Шэрэдж  Дисэ.