Жаз башында, жай кезиуде да жер-жерледе ёртенлени саны кёбейеди, от тюшер деген къоркъуу бютюнда уллу болады. Кир-кипчикни, къауданны кюйдюрюп туруу, тийишли жорукъланы сансыз этиу игиликге келтирлик тюйюлдю. Бегирек да ол электрокюч объектлени, ток ызланы къатларында болса къоркъуулуду. Аны хатасындан сау элле окъуна токсуз къалыргъа боллукъдула. Быллай хата-палахланы кёбюсюню сылтауу жууапсызлыкъдан чыгъады, дейдиле «Россети Шимал-Кавказ» компанияда.

Бегирек да къоркъуулугъа уа сабанлада къургъакъ кырдыкны кюйдюрюуню санаргъа боллукъду. Бу жарсыу саулай къыралда окъуна энчи белгиленеди, кеси да дайым къайтарылып турады. Агъачлада ёртенлени сылтауу да асламысында ма олду. Аны къой, бир-бирледе от юйлеге жетеди, адам мюлкюне, табийгъатха да бек уллу хата салады.

Бу жаны бла къоркъуусузлукъну кючлендирир хыйсап бла энергетикле жыл сайын мадар этедиле. Аны ишчилеринден къуралгъан къауумла сагъынылгъан ызланы тийрелерин юлкюледен бла бутакъладан тазалайдыла, подстанцияланы тёгереклерин къазып, от жетмезча этедиле, къоруулаучу оборудованиягъа да кёз жетдиредиле. Дагъыда юйретиуле бардырадыла, ишчилеге тийишли жорукъланы ангылатадыла.

Алай къоркъуусузлукъну энергетикле къуру кеслери жалчытып къалаллыкъ тюйюлдюле, анга адамла да къатышсала керекди. Ол себепден компанияда энтта да къайтарып айтадыла: электрокюч ызланы, объектлени къатларында от этмегиз, мал ашла, семиртгичле, бичен, салам, отун, башха затла жыймагъыз. От тюшсе, аны ёчюлтген, жайылыуун тыйгъан да къыйын боллукъду. Ол оборудованиягъа жетсе, жукъгъа жарамазча этерикди. Аны жеринден кетерип, жангысын келтиргинчи заман, ахча да къорайды, кёпле уа электрокючсюз турадыла.

От этерге жарамагъан жерледе кырдык неда кир-кипчик кюйдюрген инсан административ жууапха тартыллыкъды. Бузукълукъ этген гражданла 1-1,5, къуллукъчула – 6-15, предприятияла неда организацияла уа 150-200 минг сом тазир тёлерикдиле. Ала от этгенлери ючюн абериге хата тюшсе, тёлеуню ёлчеми андан да уллу боллукъду.

Хурметли жамауат! Электрокюч объектни къатында от жаннганын эслесегиз, «Россети» компаниягъа сёлешип билдиригиз деп тилейбиз. Аны телефон номери ма буду: 8-800-220-0-220.

Улбашланы Мурат хазырлагъанды.