Бжьэхуцым и процент 95-р целлюлозэщ. Абы псыр фIы дыдэу зыщIеф. Апхуэдизу псыIагъыр кIуэцIозагъэри, процент 40 хуэдизкIэ нэхъ Iув мэхъу. Бжьэхуцым къыхащIыкI дыгъэм и бзий гуащIэр зыпхымыкIыф щэкI. ЩэкIым и быдагъкIэ данэм ирагъапщэ.
XX лIэщIыгъуэм Германием я «Trabant» автомобиль маркэм и пкъыр (корпус) бжьэхуц зэкIэрыубам къыхащIыкIырт. Уеблэмэ зыбжанэрэ гу лъатащ бжэнхэм автомобиль къутам и кузовыр ягъэныщкIуну еныкъуэкъуу.
Бжьэхуцыр къагъэсэбэпу щытащ лIэщIыгъуэ бжыгъэхэмкIэ узэIэбэкIыжми. Абы щыхьэт техъуэ археологие къэхутэныгъэхэр щыIэщ. Япэу бжьэхуцыр къыщагъэсэбэпын щIадзащ Индием илъэс 7000 япэкIэ. Абы къыщагъуэтауэ щытащ бжьэхуцым зэрелэжь Iэмэпсымэхэр. Бжьэхуц гъэкIынымкIэ дуней псом япэ увыпIэр щиIыгъщ Индием. Нэхъ иужькIэ бжьэхуцым щелэжьын щIадзащ Алыджым, КъуэкIыпIэ Гъунэгъум. Инджылызхэм псом япэу къыщIагъэкIыу хуежьащ бжьэхуцым къыхэщIыкIа щэкIхэр. Абы 1770 гъэм къыщыунэхуащ бжьэхуцым зэрелэжь машинэ. Узбекистаным бжьэхуцыр къагъэкIын папщIэ губгъуэхэм псы щIагъэлъадэурэ, Аральскэ хыр ирагъэгъущыкIауэ щытащ. Пасэрей Китайм бжьэхуцыр нэхъ лъапIэу къыщалъытэрт данэм нэхърэ, сыту жыпIэмэ абы данэр щыкуэдт. Пасэрей Урымым и легионерхэм ящыгъыу щытащ бжьэхуц щэкIым къыхэщIыкIа фэилъхьэгъуэхэр.
УдзгъэкIхэм зрагъэсащ бжьэхуцым плъыфэ зэхуэмыдэхэр яIэ хьэзыру ягъэкIыу. Бжьэхуц щэкIыр ноби дуней псом нэхъыбэ дыдэу къыщагъэсэбэпхэм ящыщщ. Бжьэхуцым и тхъахуэр (волокно) зыхуэдэм елъытауэ, Iуданэр зэхадз тхъахуэ кIэщIым (миллиметр 27-м нэс), ику итым (миллиметр 30 - 34-рэ хуэдиз), кIыхьым (миллиметр 60-м нэблагъэ) къыхэщIыкIахэу. ЩыIэщ метри 5 - 7 зи лъагагъ бжьэхуц жыг лIэужьыгъуэхэр. Бжьэхуцым и фIагъыр къыщалъытэм деж йоплъ абы и кIыхьагъым, и плъыфэм (нэхъ хужьыху нэхъыфIщ), и къабзагъым. Бжьэхуцым и жылэр къагъэсэбэп дагъэ, хьэжыгъэ щащIкIэ. Бжьэхуцыр къызэрырахьэлIэж машинэхэм махуэм къриубыдэу бжьэхуц килограмм 700 - 800 кърахьэлIэжыф. Бжьэхуц тонным къыхэкIынущ, псалъэм папщIэ, джинс гъуэншэдж 600 - 700 хуэдиз.
Бжьэхуц къэкIыгъэм и жылэр пасэу хэсэн хуейщ – мазаем фIэмыкIыу. Бжьэхуцым и лIэужьыгъуэу хъуар хуабэ зыфIэфI къэкIыгъэщ. ЩIым нэса жылэм къызэрыкIын щIедзэ дунейм хуабагъыу цельсие 10 - 12 иIыгъыу щытмэ. Бжьэхуц къэкIыгъэхэр уэгъум фIыуэ полъэщ. Псы ямыгъуэтми ахэр къэкIыфынущ, ауэ бэв хъунукъым. Абы папщIэ псы ирикъуу щIэбгъэлъадэмэ нэхъыфIщ. Бжьэхуцыр бжьыхьэм кърахьэлIэж: фокIадэм е жэпуэгъуэм. Ар къагъэсэбэпыным хуагъэхьэзырын япэ и жылэхэр кърах.
ГУГЪУЭТ Заремэ.
