Россейни къыйын болумла жаны бла министри Александр Куренков эм жарыкъландырыу министри Сергей Кравцов сабийлени къоркъуусузларын жалчытыуда кючлерин бирикдирирча келишимге къол салгъандыла. Алай бла ведомствола граждан къорууланыу жаны бла окъуучуланы хазырлау системаны айнытыуда, адамланы бла жер-жерлени къыйын болумладан сакълауда, от тюшгени бла байламлы эм суулада къыйын болумлада къутхарыуда кючлерин бирикдирликдиле.

Ведомстволаны араларында байламлыкъла жюрютюлгенлерини хайырындан отуз жылны ичинде ёсе келген тёлюлени къоркъуусуз жашау бардырыргъа юйретген аслам проект толтурулгъанды, кадет от ёчюлтюу-къутхарчу классланы къурау жаны бла эсгертиуле этилгендиле, бюгюнлюкде уа «Пробезопасность» битеуроссей проект да жарашдырылгъанды. МЧС от ёчюлтюу-къутхарыу жаны бла эришиулени дайым къурайды, къоркъуусуз жашау бардырыуну юсюнден ачыкъ дерсле береди. Кёп сабий аралада, сёз ючюн «Артекде» бла «Орленокда» къутхарыучула профильли сменалагъа чыгъадыла.

Александр Куренков сабийлени къыйын болумлагъа хазырлагъан проектлени мындан арысында да бардырыргъа, ол мурат бла шёндюгюлю информация технологияланы хазырларгъа тийишлисин белгилегенди. Сергей Кравцов а МЧС-ни къатышыуу бла «Биринчи болушлукъ этиуню мурдорларына юйретиу, ауругъанлагъа къарау» юйретиу курсну хазырлагъанларын айтханды. Эки ведомствону да башчылары бирге ишлерге таукелликлерин билдиргендиле.

Кульчаланы Зульфия.