«Газпром газораспределение Нальчик» компания кесини ишин кючлендирилген халгъа кёчюргенди. Андан билдиргенлерича, аны магъанасы жаз башында эмда жай кезиуде черекле кётюрюлюп башланырыгъына тынгылы хазыр болурчады деп алайды. Аны себепли компанияда къурау эмда техникалы жумушланы планын жарашдыргъандыла. Ары уа не зат киреди десегиз: череклени къатларында баргъан эмда къутуруп келген суу басаргъа боллукъ тийреледе орналгъан газ быргъыланы тынгылы тинтип чыгъыу. Специалистле аллай жерледе жагъаланы кючлендирликдиле, суу ызланы кир-кипчикден, аугъан терекледен эмда юлкюледен тазаларыкъдыла. Жауунла жауа кетип, черекле ызларындан чыгъарла деген къоркъуу болса уа, адамла жеринде дежурство бардырлыкъдыла.

«Ишчилерибизни бу кезиуге хазырлайбыз, анга уллу эс бурабыз. Дагъыда техникагъа бла оборудованиягъа, авариялы къауумланы онгларына да къарайбыз, юйретиуле бардырабыз. Аны барын да айтханымы магъанасы неди: биз ол сагъынылгъан кезиулеге жик-жиги бла хазырбыз», - деп белгилегенди «Газпром газораспределение Нальчик» компанияны башчысы Залим Вороков.

Улбашланы Мурат хазырлагъанды.