2023 жылны аллындан башлап республикада къургъакъ кырдык кюйгени бла байламлы 138 болум эсепленнгенди, от ёчюлтюучюле жынгызда бир ыйыкъны ичинде 16 кере чакъырылгъандыла, деп билдиредиле МЧС-ни Къабарты-Малкъарда бёлюмюню пресс-службасындан.

  От тюшюуге келтирген сылтауланы кёбюсю адамны уллу кёллюлюгю, жорукълагъа эс бурмагъаны бла байламлыдыла. Бирле отну жандырып, ол ёчюлгюнчюге дери сакъламай кетедиле, башхалары тютюнню неда сирнекни атып къоядыла. Къургъакъ ханс а терк къабынады, жел ургъаны бла от тёгерекге жайылады, ол санда мюлклеге бла юйлеге да. Бек башы уа - аны хатасы бла адамла ёлюрге да боллукъдула.

Быллай къыйын болумланы азайтыр мурат бла министерство жанаргъа боллукъ жерлени эсепде тутады. Кир-кипчикни неда хансны кюйдюргенде къоркъуусузлукъну жорукъларына эс этмеген, бу жумушларын жамауат саулай да жыйылыучу жерледе, мюлклени тийрелеринде тамамлагъан адамла административ жууаплылыкъгъа тартыладыла. Россейни Административ бузукълукъланы кодексини 20.4 статьясыны 1-чи кесегине тийишлиликде гражданлагъа 5-15 минг сом тазир салыныргъа боллукъду, къуллукъчулагъа – 20-30 минг, энчи предпринимательлеге – 40-60 минг, юридический лицолагъа – 300-400 минг сом.

Кульчаланы Зульфия.