Налшык къалэм гъатхэпэм и 25-м щекIуэкIащ макъамэмрэ къафэмкIэ IX лъэпкъхэм зэдай зэпеуэ, «Налшык насыпым и дамыгъэщ» зыфIащар. Зэхыхьэ дахэр къызэрагъэпэщащ ди щIыналъэм и цIэр дуней псом фIыкIэ щагъэIун, лъэпкъхэм я щэнхабзэ хъугъуэфIыгъуэхэр, цIыхухэм я зэхуаку дэлъ зэныбжьэгъугъэр яхъумэн, къэрал зэмылIэужьыгъуэхэм я зэдэлэжьэкIэм зрагъэужьын папщIэ.
КъызэгъэпэщакIуэ комитетым и унафэщI, Дунейпсо, Урысейпсо Арткомитетхэм я вице-президент, ТворчествэхэмкIэ Кавказым и Академием и президент, ЩIДАА-м, РАЕН-м, ТворчествэхэмкIэ Дунейпсо Академием я академик, Кавказым и республикэ псоми щIыхь зиIэ я лэжьакIуэ, Урысейм и «Золотой орёл» литературэ саугъэтым и лауреат Бейтыгъуэн Iэуес жиIащ лъэпкъ зэмылIэужьыгъуэхэр зыхэт Iуэху гуапэр илъэс ебгъуанэ хъуауэ зэрырагъэкIуэкIыр, мыпхуэдэ зэхыхьэ щIэщыгъуэхэм мыхьэнэшхуэ зэраIэр, щIэблэм зэрылъытэ яку дэлъу, Хэкур фIыуэ ялъагъуу, зым адрейм пщIэ хуищIу къэгъэхъунымкIэ зэрысэбэпыр.
Къэбэрдей-Балъкъэр, Адыгэ, Къэрэшей-Шэрджэс, Абхъаз, Шэшэн, Дагъыстэн республикэхэм, Ставрополь крайм, Москва областым, Сочэ къалэм, Тыркум щыщ цIыху 400 хэтащ мы Iуэхум. Ди щIыналъэм исхэмрэ хьэщIэхэмрэ я зэфIэкI щеплъыжащ къафэм, уэрэд жыIэным, макъамэ Iэмэпсымэхэм еуэным, усэ, прозэ къеджэным.
- Дунейпсо, Урысейпсо Арткомитетхэр зэрылажьэ пIалъэм къриубыдэу я кIуапIэ къэтщIащ лъэпкъхэм я зэныбжьэгъугъэр зыгъэбыдэ Iэмалхэмрэ Iуэху бгъэдыхьэкIэхэмрэ. Ди IуэхущIапIэм дунейпсо, урысейпсо, щIыналъэпсо проект инхэр къызэригъэпэщащ. Апхуэдэщ «Налшык – насыпым и дамыгъэщ» Iуэхури, - къыхигъэщащ Бейтыгъуэным. – Къэрал властым и органхэм, лъэпкъ-щэнхабзэ центрхэм, жылагъуэ зэгухьэныгъэхэм жыджэру дадолажьэ, Урысейм ис лъэпкъхэм я зэкъуэтыныгъэм, къэралым и зыужьыныгъэм хэлъхьэныгъэфIхэр хуэтщIын папщIэ.
КъБР-м и Музыкэ къэрал театрым гъатхэпэм и 26-м къыщызэрагъэпэща кIэух концертым щагъэлъэпIащ зэхьэзэхуэм щытекIуахэр. Абы щаIэт текIуахэмрэ къыхэжаныкIахэмрэ. «Налшык – насыпым и дамыгъэщ» зэпеуэм и Гран-при саугъэтыр хуагъэфэщащ адыгэ къафэхэмкIэ «Шапсугия» цIыхубэ ансамблым (Сочэ къалэ). Художественнэ унафэщIыр Тэрчокъуэ Быбэщ.
Республикэм щыпсэухэм къадэкIуэу, хамэ щIыпIэхэм къикIа хьэщIэхэри куэду зэрызэхуэсар гуапэт. ГъэщIэгъуэнт, щIэщыгъуэт лъэпкъ къафэхэм, фащэхэм я дахагъэм укIэлъыплъыну. КъыпхуэмыIуэтэну удэзыхьэхт дэтхэнэ зы лъэпкъми и къэфэкIэр. Сыт щыгъуи хуэдэу, зыхэпщIэрт къафэр бзэ зэрыхуэмыныкъуэр. Ди республикэм и уэрэджыIакIуэ, къэфакIуэ цIэрыIуэхэми фестивалыр ягъэбжьыфIащ. Абыхэм хьэщIэхэм фIыщIэ хуащIащ Къэбэрдей-Балъкъэрым щекIуэкI фестивалым хэтыну, я щэнхабзэ хъугъуэфIыгъуэхэр, къафэ гъуазджэр ягъэлъэгъуэну къызэрытхуеблэгъам папщIэ. Зэхьэзэхуэм хэтахэми фIыщIэ хуащIащ ар зэхэзыублахэм гуапэу зэрырагъэблэгъам, гукъинэжу зэрагъэхьэщIам, нэгъуэщI лъэпкъхэм я щэнхабзэм, хабзэм зыхагъэгъуэзэну, щIыуэпс дахэ, къулей зиIэ, гуапагъэр зэбэкI цIыхухэр щыпсэу Налшык къалэм зыщаплъыхьыну Iэмал зэраIам папщIэ.
Сурэтхэр Къарей Элинэ трихащ.
ТЕКIУЖЬ Заретэ.
