А фIэщыгъэм щIэту къафэмрэ уэрэдымкIэ «Амикс» гупым концерт-уэршэр пшыхьхэр Къэбэрдей-Балъкъэр къэрал университетым щригъэжьащ.
«Сыножьэ, къэгъэзэж» япэ пшыхьыр ЦIыпIынэ Аслъэн и цIэр зезыхьэ Адыгэ щэнхабзэ центрыр хэту къызэрагъэпэщащ.
Гупым я унафэщI, КъБР-м щэнхабзэмкIэ щIыхь зиIэ и лэжьакIуэ Къул Амир зэрыжиIамкIэ, апхуэдэ зэхыхьэ Отаров Керим и цIэр зезыхьэ Балъкъэр щэнхабзэ центрми и гъусэу ящIыну я мурадщ.
- Иджырей пшыхьыр хуэгъэпсауэ щытащ Украинэмрэ ди къэралымрэ я гъунапкъэхэм къыщыхъу Iуэхугъуэхэм. Ди къэралым щыпсэу куэдым хуэдэу, дэри а Iуэхухэм дрогузавэ. Уэрэдхэр къыхэтхын ипэ, сэ щIалэгъуалэм сепсалъэ-ри, я Iуэху еплъыкIэм зыщызгъэгъуэзащ. ЩIалэр армэм зэрыдашыр, итIанэ къулыкъу ищIауэ къызэригъэзэжыр теплъэгъуэ цIыкIу хуэдэу концертым къыщыдгъэлъэгъуащ, - жеIэ Къулым.
ЦIыпIынэ Аслъэн и цIэр зезыхьэ Адыгэ щэнхабзэ центрым и унафэщI, филологие щIэныгъэхэмкIэ кандидат Езауэ Мадинэ къыщыпсалъэм къыхигъэщащ студент щIалэгъуалэр дапщэщи зэманым декIуу, абы и къэхъукъащIэхэми пэджэжу щытын хуейуэ къызэрилъытэр.
- Музыкэ спектаклым хэтащ дохутыр, журналист, филолог IэщIагъэхэм хуеджэ студентхэр. Къыхэгъэщыпхъэщ мы гупым урыс, балъкъэр хъыджэбз цIыкIухэр къызэрыхашар. Абыхэм икъукIэ дахэу адыгэбзэкIэ уэрэд жаIащ. ЩIалэгъуалэм яфIэфI дыдэу мы Iуэхур къызэдащтащ икIи лъэпкъ зэхэгъэж зэрамыIэм хуабжьу сегъэгуфIэ. Сэ гу лъыстащ иджырей щIэблэр, сыт хуэдэ лъэпкъ къыхэкIари, зэрызэгурыIуэным яужь зэритым, - жеIэ Мадинэ.
Иджыблагъэ Къэбэрдей-Балъкъэр къэрал университетым щагъэлъэгъуа концерт-уэршэр пшыхьхэм хуэдэхэр нэхъыбэ ящIыну я мурадщ.
Тэрчокъуэ Дисэ.
