КъМР-ни Башчысы Казбек Коков Россей Федерацияны Президентини Шимал-Кавказ федерал округда толу эркинликли келечиси Юрий Чайканы башчылыгъы бла видеоконференция халда бардырылгъан кенгешге къатышханды. Аны кезиуюнде сёз энчи аскер операциягъа къатышханланы гуманитар эмда техника болушлукъну къурауну юсюнден баргъанды. 

Къырал башчыны келечиси аскерчилени, къазауатха кеси ыразылыкълары бла баргъанлагъа бла аланы юйюрлерине тийишли болгъан социал себепликни алжаусуз толтурууну, аланы хар керек затла бла жалчытыуну магъанасы уллу болгъанын эсгертгенди.

Кенгешде дагъыда регионлада аскер-патриот ишни кючлендириуге уллу эс бурулгъанды. Жаш тёлю къымылдаула бла байламлыкъланы, ангылатыу ишни да игилендирмей жарамазлыгъы чертилгенди. Юрий Чайка: «Аскер-патриот ишге ат башындан къараргъа арталлыда жарарыкъ тюйюлдю, субъектде, саулай къыралда да жамауат эмда политика болумну юсюнден тюз оюмну къурар ючюн жаш тёлю бла дайым сёлешип турургъа керекди»,- дегенди, деп билдиргендиле КъМР-ни Башчысыны бла Правительствосуну пресс-службасындан.

Юсюпланы Галина хазырлагъанды.