КъБР-м и Iэтащхьэ КIуэкIуэ Казбек иджыблагъэ яIущIащ ди республикэм щылажьэ хьэрычэтыщIэ щIалэгъуалэм. Зэхуэсым щытепсэлъыхьащ щIыналъэм и мэкъумэш, турист, спорт, цIыхухэм Iуэхутхьэбзэ яхуэщIэн, ухуэныгъэ, нэгъуэщI IэнатIэхэм хьэрычэт Iуэхум нэхъыфIу зэрызыщебгъэужь хъуну Iэмалхэмрэ хэкIыпIэхэмрэ.
Лэжьыгъэм жыджэру хэтахэм утыку ирахьащ а Iуэхугъуэхэм ятещIыхьауэ яIэ мурадхэр, проектхэр, Iуэху зехьэкIэхэмкIи зэдэгуэшащ. Апхуэдэхэщ КъБР-м экономикэ зыужьыныгъэмкIэ и министр Рахаев Борис, КъБР-м щIалэгъуалэм я IуэхухэмкIэ и министр Лу Азэмэт, Налшык къалэ администрацэм и Iэтащхьэ Ахъуэхъу Таймураз, «Си хьэрычэт IэнатIэ» центрым и унафэщI Дудуевэ Мадинэ, Кредит цIыкIухэмкIэ фондым и пашэ Дудар Хьэдис, ШэсыпIэ фондым и унафэщI Тхьэбысым Аскэр, «Урысейм и щIэгъэ-къуэн» зэгухьэныгъэм и унафэщI Къылъшыкъуэ Альберт, «Iуэху щызэфIах УрысейД» зэгухьэныгъэм и лIыкIуэ Гузеевэ Индирэ, КъБР-м и Сату-промышленнэ палатэм и унафэщIым и къуэдзэ ГъукIэлI Мурат, «ТG» компанием и пашэ Теунэ Мурат, ХъумапIэ банкым и щIыналъэ IэнатIэм и унафэщI КIэрэф Къамболэт, «Урысеймэкъумэшбанкым» и щIыналъэ IэнатIэм и унафэщI Сокъур Алим, «Промсвязьбанк»-м и щIыналъэ IэнатIэм и унафэщI Нэхущ Азэмэт сымэ.
«ХьэрычэтыщIэ Iуэхум пэрыт щIалэгъуалэм къыхалъхьэ проектхэм, я Iуэху еплъыкIэхэм гупсэхуу щыгъуазэ зыхуэтщIынущ, ахэр гъэзэщIэнымкIи щIэгъэкъуэн дыхъунущ», - къигъэгугъащ къызэхуэсахэр КIуэкIуэ Казбек.
Зэхуэсым зи гугъу щащIахэм ящыщщ дуней псом мы зэманым щыщыIэ геополитикэ щытыкIэри. Абы ехьэлIауэ КIуэкIуэ Казбек къыхигъэщащ ди къэралыр зрагъэува экономикэ дэкъузэныгъэм зыужьыныгъэмкIэ IэмалыфIхэр къызэрыдэкIуар, дызэрыт щытыкIэ гугъум дыкъызэрикIыфынур. Къапщтэмэ, ди республикэм нэхъыбэ щыхъуащ хьэрычэт Iуэхум зезытахэм я бжыгъэр. Иужьрей илъэси 3-м къриубыдэу хьэрычэт мыинрэ курытрэ щызэфIах IуэхущIапIэхэм (МСП) 1600-рэ къахэхъуащ. Зи щхьэ Iуэху зезыхуэж хьэрычэтыщIэу зрагъэтхащ цIыху мин 58-м щIигъум. ИлъэситI ипэкIэ апхуэдэхэр зэрыхъуу щытар мин 13,6-рэщ. ЯIэ хэхъуэхэм къыхэкI налогыу илъэс блэкIам щIыналъэ бюджетым къихъуащ сом мелуан 40-м щIигъу, МСП-хэм апхуэдэ мылъкуу къабгъэдэкIащ сом мелард 1,6-рэ. А лъэхъэнэ дыдэм къриубыдэу МСП-хэм я мылъкум хагъэхъуащ процент 35-кIэ. 2022 гъэм ар хъуащ сом мелард 16,2-рэ.
ЩIыналъэ унафэщIым къызэрыхигъэщамкIэ, хьэрычэт IуэхущIапIэ мыинхэм, курытхэм зэфIах лэжьыгъэхэм я фIыгъэкIэ республикэм жыджэру зыщаужь шхапIэ, хьэщIэщ, турист унэтIыныгъэхэм. Апхуэдэу КIуэкIуэм къыхигъэщащ Налшык и инфраструктурэмрэ и теплъэмрэ егъэфIэкIуэн зэрыхуейри. «Къалащхьэм и теплъэр нэгъуэщIу си нэгу къыщIохьэ. А унэтIыныгъэм зэгъусэу делэжьмэ, ди мурадхэм нэхъ щIэх далъэIэсынущ. Налшык къалэр къэдгъэщIэрэщIэн хуейщ лъэныкъуэ куэдкIэ, итIанэ абыкIэ зыгъэпсэхуакIуэ нэхъыбэ нэхъ къеплъэкIынущ. Нэхъыщхьэращи, а Iуэхум зегъэужьынымкIэ Iэмалхэр щыIэщ», - жиIащ КъБР-м и Iэтащхьэм.
Къалащхьэм игъуэт зыужьыныгъэм тепсэлъыхьу, КIуэкIуэ Казбек къыхигъэбелджылыкIащ абы хьэщIэщыщIэхэр зэрыдащIыхьар, зыгъэпсэхупIэщIэхэр, автомашинэ гъэувыпIэщIэхэр зэрыщаухуар, курорт Iуэхум зегъэужьынымкIэ Налшык хуэдэу псы хущхъуэхэмкIэ, узыншагъэм сэбэп хуэхъу минералхэмкIэ къулей щIыпIэ куэд зэрыщымыIэр. Ар къалэм и хъугъуэфIыгъуэхэм ящыщщ.
«Налшык и инфраструктурэр егъэфIэкIуэнымкIэ куэд зэфIэдгъэкIащ, атIэми хуэдищкIэ нэхъыбэ зэдгъэхъулIэн хуейщ. БлэкIа 2022 гъэр мыIейуэ щытащ абы и лъэныкъуэкIэ. А Iуэхум адэкIи пытщэнущ, дызэгъусэу делэжьынущ Налшыки республикэри зэпэщ тщIыным. Дэ къетхьэжьэ Iуэхухэм пащэнщ дяужь къихъуэ щIэблэхэм», - гугъэфIхэр зыхэлъ апхуэдэ псалъэхэмкIэ зэхуэсыр зэхуищIыжащ КъБР-м и Iэтащхьэм.
КъБР-м и Iэтащхьэмрэ Правительствэмрэ я пресс-IуэхущIапIэ.
