Битеуроссей халкъ фронтну алгъыннгы тинтиулеринден сора «Кавказ» санаторийни башчылары битеу ачыкъланнган кемчиликлени кетергендиле. Ол не затла эдиле: сыннган терезеле, ачыкъ ток чыбыкъла, бузулгъан розеткала... Не сейир, тинтиучюле аланы барын да сабийле солугъан корпуслада кёргендиле.

Бу санаторий Акъ-Суудады. Биринчи рейдни ОНФ-ни, КъМР-де сабийлени эркинликлерин къоруулау жаны бла Уполномоченный эмда Урунуу эм социал къоруулау министерствону келечилери бардыргъандыла. Ала анда сабийле къалай солугъанларына, жашау болумларына, ашларына къарагъандыла, не бла кюрешгенлерин, къалай солугъанларын тинтгендиле. Дагъыда ала ойнаучу эмда спорт майданчыкълагъа да кёз жетдиргендиле.  

Тинтиуню эсеплери артыкъ къууандырмагъандыла. Сыннган терезеле, отоулада бузулгъан розеткала, электрокюч чыбыкъла ачыкъ болуп, эски мебель – ата-анала эмда къонакъла эм биринчиден ма алагъа эс бургъандыла. Ызы бла ОНФ аны контрольгъа алгъанды, министерствогъа да бир мадар этигиз деп письмо жибергенди.

Алай бла иш башланнганды. Санаторийде отоулагъа ремонт этгендиле, къабыргъаланы боягъандыла, розеткаланы эмда токну ёчюлтюучю затланы жангыртхандыла, коридорлада отну ёчюлтюучю абериле да орнатхандыла, эски мебельни бир кесегин да жангыртхандыла.

«Къайтып баргъаныбызда сабийле тургъан жерледе хар не да игирек болгъанын кёргенбиз. Санаторийни башчыларын анда от тюшюу жаны бла къоркъуусузлукъгъа бек сакъ болургъа чакъыргъан эдик. Ток чыбыкъла ачыкъ болуп тургъанда уа аны юсюнден айтыр амал окъуна жокъду. Энди уа розеткала жерлеринде болгъанларын, терезеледе сыннган миялаланы да алышханларын кёргенбиз. Дагъыда мекямны къатында жылыу баргъан быргъыны ачыкъ жерлерине адамны къолу жетмезча этгендиле. Алай бла сабийлени солуу кезиулери анда иги, къоркъуусуз  да болур деп ышанабыз», - дегенди ОНФ-ни Къабарты-Малкъарда бёлюмюню келечиси Евгений Бакаев.

Улбашланы Мурат хазырлагъанды.