Лъэпкъ къэрал музейм мазаем и 7-м щыщIэдзауэ щагъэлъагъуэ КъБР-м и цIыхубэ художник, ХудожествэхэмкIэ Урысей Академием и академик, Урысейм и Абстракционистхэм (САБРОС), «Урысейм и сурэтыщIхэм я зэгухьэныгъэ» творческэ жылагъуэ союзхэм хэт Къанокъуэ Руслан и лэжьыгъэ телъыджэхэр.
КъБР-м щэнхабзэмкIэ и министрым и къуэдзэ Карчаевэ Iэминэ выставкэр къыщызэIуихым жиIащ зи абстракцэ лэжьыгъэхэр япэу ди щIыналъэм щагъэлъагъуэ Къанокъуэ Руслан и IэпщIэлъапщIагъэм щIэи гъуни зэримыIэр, абы и IэдакъэщIэкIхэр зыми зэремыщхьыр.
- Зи хъэтI зиIэж Къанокъуэ Руслан и сурэтхэм хуэдэ зы щIыпIи щыплъагъунукъым. Урысейм, нэгъуэщI щIыпIэхэм щекIуэкI выставкэ зэмылIэужьыгъуэхэм утыку къыщрихьэ и лэжьыгъэхэр сыт щыгъуи щIэщыгъуэ, гъэщIэгъуэн ящохъу, - жиIащ Карчаевэм. - Гъуазджэмрэ щэнхабзэмрэ зыгъэбей, дызэрыгушхуэ сурэтыщIым дяпэкIи и IэщIагъэм ехъулIэныгъэхэр щиIэну, и хъуэпсапIэхэр къехъулIэну ди гуапэщ! Республикэм щыпсэухэмрэ абы и хьэщIэхэмрэ сынывохъуэхъу выставкэ купщIафIэмкIэ!
КъБР-м и Iэтащхьэм и деж щылажьэ Эксперт-аналитикэ цент-рым и унафэщI Тау Пщыкъан и псалъэм къыхигъэщащ Руслан гъуазджэм и лIэужьыгъуэ щIэщыгъуэ къызэрыхихар, цIыхум и гурыгъу-гурыщIэхэр гъуджэм хуэдэу къызэригъэлъагъуэр, и абстракцэ лэжьыгъэхэр нобэрей гъащIэм зэрыпэджэжыр.
Зэхыхьэм къыщыпсэлъащ КъБР-м и Парламентым и депутат Токъу Руслан, КъБР-м и цIыхубэ сурэтыщI Жылэ Анатолэ, КъБР-м и СурэтыщIхэм я зэгухьэныгъэм хэт Сурхайханов Ибрэхьим, КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ, Налшык къалэ округым и къалэ Советым и депутат КIыщокъуэ Руслан, УФ-м и Сурэттеххэм я зэгухьэныгъэм хэт, ТворчествэхэмкIэ Дунейпсо академием и академик, сурэтыщI Вэрокъуэ Заур сымэ, нэгъуэщIхэри.
Къэпсэлъахэм гу лъатащ лэжьыгъэр зытеухуамрэ абы ирит плъыфэмрэ Къанокъуэ Руслан хуэдэу зэзыгъэкIуф сурэтыщI къызэрыгъуэтыгъуейр, мифологием, хьэршым я деж щыщIэдзауэ щалъхуа Шытхьэлэ къуажэм щыщIэкIыжу и сурэтхэм удихьэхыу къызэрыщигъэлъагъуэр, абыхэм ящIэлъ гупсысэр зэрыгъэщIэгъуэныщэр и выставкэм щIэупщIэшхуэ зэриIэр.
Къанокъуэхэ я лъэпкъым щыщ нэхъыжьыфI Мухьэдин жиIащ Руслан и лэжьыгъэхэр республикэм и гъуазджэмрэ щэнхабзэмрэ я хэлъхьэныгъэфIу зэрыщытыр, щIэблэр а дахагъэм щIэпIыкIын зэрыхуейр.
Езы Къанокъуэ Руслан фIыщIэ яхуищIащ и выставкэм зыкърезыгъэхьэлIахэм икIи жиIащ гъуазджэм дихьэххэр и зэфIэкIхэмкIэ игъэгуфIэну зэригуапэр.
Гъуазджэм и лIэужьыгъуэ куэдым Къанокъуэр зэрыхуэIэкIуэлъакIуэр умыгъэщIэгъуэн плъэкIыркъым. Выставкэм хагъэхьащ абы дамыгъэхэмрэ плъыфэхэмрэ куэду зыхиухуэна «ЦIыхухъу-цIыхубз», «Гъэм и зэманхэр», «ШейтIан фызышэ» зыфIища компьютер графикэ лэжьыгъэхэр. Сурэт щIыным, графикэм къыдэкIуэу, декоративнэ-прикладной гъуазджэми зэфIэкIхэр щиIэщ, ар гъущIымрэ пхъэмрэ йолэжь. ИтIанэ, Руслан и лэжьыгъэхэр зыми хэбгъэгъуэщэнкIэ Iэмал иIэкъым, плъыфэ щхъуэкIэплъыкIэхэр апхуэдизкIэ екIуу хеухуанэри.
Къанокъуэ Руслан Башир и къуэр Аруан районым хыхьэ Шытхьэлэ къуажэм 1949 гъэм къыщалъхуащ. Орёл къалэм промышленностым, щэнхабзэмрэ гъуазджэмрэ я дизайнерхэр щагъэхьэзыр художественнэ училищэр 1976 гъэм къиухащ, художник-гъэщIэрэщIакIуэ IэщIагъэр иIэу. И лэжьыгъэхэр щагъэлъэгъуащ «Панорама» художественнэ галереем, Минводы, Сочэ, Грознэ къалэхэм, нэгъуэщI щIыпIэхэм. КъищынэмыщIауэ, и IэдакъэщIэкIхэм дихьэххэм Iэмал яIэщ ахэр зэпымыууэ щагъэлъагъуэ Radisson Blu (Сочэ), «Синдика» (Налшык) художественнэ салоным зыщыхагъэгъуэзэну.
ТЕКIУЖЬ Заретэ.