КъМР-ни Башчысы Казбек Коков кезиулю «муниципал сагъатны» бардыргъанды.
Анда сёз миллет проектлени, шахарда ырахат болум къурауну, республиканы шахарларын бла эллерин тап халгъа келтириуню юслеринден баргъанды.
Муниципал къуралыулада 2023 жылда миллет проектлени бардырыугъа 1,6 миллиард сом чакълы бёлюнюрюкдю. Сёз «Хар сабийни жетишими», «Маданият болум», «Хунерли адамла», «Шахарда ырахат болум къурау» регион проектлени, тозурагъан юйледен кёчюрюуню, жолла ишлеуню юслеринден барады.
Андан сора да, быйылдан башлап жангы проект къолгъа алынады – «Жаш тёлюге себеплик этиуню игилендириу». Миллет проектледен тышында да билим бериуню учрежденияларына тынгылы ремонт этиуге 1,6 миллиард сом бёлюрге белгиленеди. Муниципалитетле бла ахча бёлюуню юсюнден келишимлеге къол салыннганды. Казбек Коков муниципалитетле берген проектлени хар бирине да тынгылы къараргъа эмда сюзерге буюргъанды.
Былтыр федерал, регион эмда муниципал ырысхыгъа жамауат жерледен 31-рин, арбазладан да 102-син тапландырыргъа къолдан келгенди. Быйыл республикалы конкурсну эсеплерине кёре 12 жамауат тийрени, «Шахарда ырахат болум къурау» проектге кёре уа 48 жамауат жерни бла 100 арбазны тапландырыргъа белгиленеди.
Андан сора да, Нарткъалада «Нарт» ара парк жангыртыллыкъды. КъМР-ни Башчысы Урван районну муниципал командасыны ол проекти шахарда ырахат болум къурау бла байламлы проектлени 6-чы битеуроссей конкурсда хорлагъанын эсге салгъанды. Кёп болмай РФ-ни Правительствосу проектни жашауда бардырыргъа деп 85 миллион сом бёлгенди. Муниципалитет да 9,6 миллион сом къошарыкъды.
Жыйылыуда жашау журтла-коммунал комплексни эмда жол мюлкню юслеринден да сёлешиннгенди. Казбек Коков келир кезиуде тамамларгъа керек боллукъ талай буйрукъ бергенди, ол санда тап халгъа келтириллик объектлени 2024 жылгъа планын жарашдырып башларгъа кереклисин эсгертгенди, деп билдиргендиле КъМР-ни Башчысыны бла Правительствосуну пресс-службасындан.
