Картофну тазалагъанда, къабугъу бла бирге аны кесинден эсе кёбюрек болгъан хайырлы затлары кетедиле. Сёз ючюн, анда ферментле картоф крахмалны хайырланыргъа себеплик этедиле. Крахмал а неди, неге жарайды?

Ол картофну ичинде болады. Аны тартып, жуууп, ызы бла тазалап эмда къургъакъсытып алай этедиле. Крахмал кёп затлада изленеди. Аны къошуп, тылы, тюрлю-тюрлю соусла, конфетле, къыймала, майонезле, кетчупла, шорпала окъуна этедиле. Оруслуланы тёрели миллет суусаплары – кисель, ансыз болмайды. Крахмал адамны аш орунуна хайырлы болгъанын медикле да белгилейдиле.

Шимал Кавказны регионла аралы ветеринария лабораториясыны Къабарты-Малкъарда бёлюмюню химик-аналитик специалисти Ирина Молова крахмалны ма быллай хайыры болгъанын белгилегенди:

- къанда эмда бауурда холестеринни мардасын азайтады;

- санлада артыкъ сууну кетереди. Ол а бюйреклери ауругъанлагъа игиди;

- ауур ашха саналмагъаны ючюн, аш орун ауругъанда хайырланыргъа жарайды;

- крахмалда тазаланмагъан углеводла аслам халда болгъанлары ючюн, ол кёп тюрлю аурууладан бакъгъанда хайырлыды;

- диабетден къыйналгъанлагъа игиди: бал туз къаннга терк татымазгъа болушады;

- адамны иммунитетине тутхучлукъ этеди;

- адамны чархында органика кислота деген затла, В2 витамин, рибофлавин чыгъарыргъа болушады;

- картофну къабугъун артмай биширгенде, анда С витамин чыгъады;

- аны фармакологияда кёп тюрлю дарманла жарашдыргъанда хайырланадыла;

- крахмал къошулгъан исси суугъа аллергиялары болгъанла кирселе, ол эс тапдырыргъа боллукъду.

Улбашланы Мурат хазырлагъанды.