Чегем районну полициясында къуллукъ этгенле кеслерини ёлген нёгерлерини юйюрюн жокълагъандыла. Ала МВД-ны район бёлюмюню жамауат советини башчысы Аскерби Коков бла бирге Аскер Дышековну анасы Лиманы кёре баргъандыла. Аны жашы 2005 жылда 13 октябрьде Нальчикге сауутланнган аманлыкъчыла чапханда, къуллукъ борчун толтура ёлгенди.  

Бёлюмню башчысы полицияны полковниги Мурат Хажнагоев, ажымлы ёлген полициячыны анасына жашын алай жигит ёсдюргени ючюн ыспас этгенди эм къайгъы сёз бергенди.

- Сизни жюрегигизни жапсараллыкъ тюйюлбюз. Ёлген тенглерибизни сагъыныргъа не заманда да бек къыйын болады. Алай биз шёндю аланы хайырындан жашап, кесибизни къыралыбызгъа къуллукъ этебиз. Жашыгъызны алай иги ёсдюргенигиз ючюн сау болугъуз. Ахыр такъыйкъасына дери ол къыралыны аллында борчуна, аскер антына кертичи болгъанлай къалгъанды, - дегенди Мурат Хажнагоев.  

Къонакъла тенглерини юйюрю бла ушакъ этип, не жаны бла да болушургъа хазыр болгъанларын айтхандыла, деп билдиргенди Росгвардияны пресс-службасындан.

Баллиланы Алина.