МЧС-ни Къабарты-Малкъарда Баш управлениясында ведомствола аралы жыйылыуу болгъанды. Анда пилот сынауланы чегинде республикада къыйын болумну юсюнден билдириу  КОСПАС-САРСАТ радиомаяк системаны хайырланыуну юсюнден келишимге къол салыннганды, деп билдиредиле ведомствону пресс-службасындан.

  Жыйылыугъа управленияны башчысы Михаил Надежин, регионну курортла эм туризм министри  Мурат Шогенцуков, «Морсвязьспутник» федерал унитар предприятияны генеральный директору Андрей Куропятников бла къыйын болумлада управление этиу араны таматасы Аслан Таов къатышхандыла.

 Келишим тауусулурдан алгъа ПАРМ-406СП радиомаяк республиканы тау районларында да сыналгъанды. Космом приборостроение илму-излем институтну келечиси Сергей Чеботарев сейирлери болгъан министерстволаны приборну энчиликлери, аны ишлеую бла шагъырейлендиргенди. Ол билдиргенича, бу маяк экстремальный солууну бла туризмни къурауда хайырланылыргъа боллукъду. Аны бла къыйын болум чыкъгъан жерни координаталары бла болушлукъ излеу сигналны КОСПАС-САРСАТ системагъа иерге жарарыкъды. Радиомаяк кеси антеннасы бла приёмникден, авария радиосигналланы передатчигинден, проблесковый маякдан, автоном халда зарядка берген блокдан къуралады, тохтаусуз азындан 48 сагъатны ишлеяллыкъды. Зарядкагъа салынады, энтта къалай бир ишлеригин эм ишлеуню амалларын кёргюзтген светодиод индикаторлары да бардыла.

Кульчаланы Зульфия.