КъМР-ни Башчысы Казбек Коковну инфраструктура къурулуш бла байламлы берген буйрукъларыны чеклеринде КъМР-ни Правительствосуну Председатели Мусукланы Алий Россей Федерацияны Регионланы айнытыу жаны бла комиссиясыны президиумуну жыйылыууна къатышханды. Аны РФ-ни Правительствосуну Председателини орунбасары Марат Хуснуллин бардыргъанды.
Кенгешде миллет эмда федерал проектлени толтуруу не халда болгъанына, къурулушда законлу мардаланы тапландырыуну амалларына эмда инфраструктура къурулушха ахча алыр ючюн проектлени сайлаугъа регионланы заявкаларына къаралгъанды.
Правительстволу комиссия Къабарты-Малкъар Республиканы заявкасын къабыл кёргенди. Сёз Бахсандагъы суу ызны биринчи кесегин тартыугъа 2024–2025 жыллагъа 602,5 миллион сомгъа бюджет кредит бёлюуню юсюнден барады. Алгъаракълада уа регионнга бу проектге бюджетден 2022–2023 жыллагъа 2,1 миллиард сом бёлюннгенди.
Проектге кёре Бахсан районну жети элине эмда Бахсан шахаргъа 79-километрлик суу ызны тартыргъа эмда жашау журтланы къурулушларына да инфраструктура жаны бла себеплик этерге белгиленеди. Ол жумуш тындырылса, Бахсан шахар округда, Заюково, Атажукино, Исламей, Баксанёнок бла Псычох элледе жашагъанланы – битеу да 98 минг чакълы адамны, ол эллени терк айный баргъанларын эсге алсагъ а,160 минг адамны окъуна – суу бла жалчытыргъа къолдан келликди.
Марат Хуснуллин къурулуш бёлюмню закон мардала бла байламлы къаллай оноула этилгенлерини юсюнден да билдиргенди. «Биз былтыр окъуна бу бёлюмде бюрократия чырмауланы азайтыуну къолгъа алгъан эдик. Къурулушну айнытыуну жангы стратегиясында аны энтта да бир кере белгилегенбиз. Къырал Дума жаз башы сессиясында къурулуш бёлюмге баш магъананы тутхан 12 федерал законну къабыл кёргенди. Алагъа тийишлиликде законодательствогъа 100-ге жууукъ тюзетиу кийирирге белгиленеди», – дегенди ол.
Алайды да, шахарда къурулушну проектлерин жарашдырыуну регион мардасы эки айдан 15 ишчи кюннге дери къысхартыллыкъды. Концессиялы келишимлеге тюрлениулени тынч амал бла эмда монополиялагъа къажау органдан эркинлик алмай кийирирге боллукъду. Аллай мадарла санкцияланы кезиуюнде къурулуш материалланы неда оборудованияны импорт тюрлюлерин алышыргъа керек болгъанда, къурулушну тыйгъычсыз бардырыр ючюн этиледиле.
Налог кодексге да тюзетиуле кийирилгендиле. Ол санда инженер коммуникацияланы иелери, жашау журтла ишлегенле да инфраструктура объектлени муниципал иеликге берген заманда, аладан алыннган налог азайтылады. Къурулушну бардыргъандан изленнген документлени тизмеси да бек аздан 100 пунктха къысхартылады. Дагъыда къурулуш бардырылыр ючюн этилиннген келишимлени саны да азайтылады.
Андан сора да, энди инсанла кадастр эсепге тынч тюшерге эмда ишлеген объектлерине эркинликни кёпге созмай регистрация этдирирге боллукъдула. Къырал регистратор жаланда эки документни болгъанларына бла къалгъанларына къараргъа керекди. Сёз къурулушну бардырыргъа эркинликни эмда объектни техника планыны юслеринден барады. Аны бла бирге кадастр ишлени бардырыуну, кадастр эсепге салыуну, жер участкаланы юйле неда жашауда керекли башха затла ишлеуге кёчюрюрге эркинликге регистрация этиуню болжалы юч кюннге дери къысхартылады.
КъМР-ни Башчысыны бла Правительствосуну пресс-службасы.
