Къашхатауда ГЭС-де тактика-энчи юйретиуле бардырылгъандыла. РусГидро компанияны анга къатышхан специалистлери энергетика комплексде объектлени къыйын табийгъат болумладан къоруулау амалланы сынап кёргендиле.
Бу жолгъу юйретиуле жер тебип, станцияда суу баргъан уллу быргъыладан бири сынып, объектни баш мекямын суу басхан сылтау бла башлагъандыла. Аны хатасындан а оборудование бузулуп, аны ичинде жау черекге тёгюлюр къоркъуу чыкъгъанды.
Информацияны мычымай компанияны аналитика арасына, Черек районну дежурный-диспетчер службасына эмда МЧС-ге жибередиле. Ызы бла юйретиулеге къатышханла мадар этип башлайдыла. Ала биринчиден авария болгъан жерни тинтгендиле, ачыгъан ишчилени медицина учреждение таба ашыргъандыла. Андан сора станцияны ичине кетген сууну чыгъарып башлагъандыла.
Кёп да бармай станциягъа «ЭКОСПАС» араны специалистлери да жетгендиле. Ала аварияны тыйгъандыла, ол тёгюлген жауну да жыйгъандыла. «Гидроремонт» компанияны келечилери уа бузулгъан быргъыны жангыртып тебирегендиле. Алай бла РусГидрону Къабарты-Малкъарда бёлюмюнде бу юйретиуле къыйматлы болгъанын белгилегендиле.

Улбашланы Мурат
хазырлагъанды.