Озгъан шабат кюн Нальчикни солуу паркында болгъанланы малкъарлы сабийлени жыр айтыу эм тепсеу жаны бла фахмулары бла шагъырейленир онглары бар эди. Анда Мечиланы Кязим атлы фонд къурап, «Къолумдагъы кюнчюк» деген жарыкъ байрам ётгенди. Анга Нальчик, Тырныаууз шахарланы эм эллерибизни келечилери къатышхандыла.
Эки сагъатдан аслам баргъан концертни уллу, гитче да жаратханлары хакъ эди.  Фондну таматасы Аппайланы Лариса бу башламчылыкъны юсюнден айта, быллай энчи сабий концертлени дайым бардырыргъа умут этилгенин билдиргенди.
- Бизге, журналистлеге, ишибиз бла байламлы кёп тюрлю жерде болургъа тюшеди. Алада миллетибизде кёп фахмулу сабийлени жырлагъанларын, тепсегенлерин кёребиз. Сора аланы башхала да кёрюрлерин, билирлерин сюйгенме. Ма ол себепден, аланы бирге жыйышдырып, быллай концерт программа къурагъанбыз фондну юсю бла, - дегенди ол.
Концертни Жаппуланы Расул бла  Болатланы Альфия бардыргъандыла. Ачхан а «Асса» сабий тепсеу къауум этгенди. Шахарны къонакълары, ата-анала да бу фахмулу коллективге къарсларын къызгъанмагъандыла. КъМР-ни сыйлы артисткасы Къарчаланы Раиса юйретген къауум кёп тюрлю эришиуледе хорлагъанлай келеди. Бюгюнлюкде анда тепсегенлени аслам таулу сабийле болгъанлары да къууандырады. Концертде да ала ариу тепсеулеринден бирин саугъа этген эдиле.
Тырныауузчу Аппайланы Алина «Элбрус» тепсеу къауумну солисткасыды. Бери ол Жаникаланы Элдарны «Тепсеген таулу къызгъа» деген жырына салыннган тепсеую бла келген эди. Аны жыйылгъанла бек жаратхан эдиле.
Жаболаны Анжеланы «Тау гюл» студиясыны келечилери уа халкъгъа гюржю тепсеуню саугъалагъандыла.
Сабийлерибизни жыр искусствода жетишимлиликлерини юсюнден айта, хунерли къызчыкъларыбыз бла жашларыбыз аслам болгъанын чертирчады. Аламат жырлагъандан сора да, сахнада кесин жюрюте билиу бек магъаналыды. Ол жаны бла да алагъа сукъланырчады. Трамланы Самира, Атабийланы Алибек, Къулийланы Заур, Геккиланы Айна, Жашууланы Алёна, Махийланы Амирина эм башхала ана тилибизде жыр айтыулары бла къууандыргъандыла. Аланы араларында бек гитчечик къашхатаучу Махийланы Амирина эди. Ол бери гинжи бешигин да келтирип, малкъар тилде бешик жырны айтханды.    
Концертге башха миллетлени келечилери да къатышхандыла. Ала да кеси тиллеринде эм орусча  жырла айтхандыла.
Къууанчлы байрамны жауа да тохтай тургъан жауунчукъ окъуна бузалмагъанды. Жыйылгъанла, артистле бла бирге тепсеп, заманларын зауукълу ётдюргендиле.
Къасымланы Аминат.