Къабарты-Малкъарда, Ставрополь крайда, Къарачай-Черкесде эм Шимал Осетияда федерал трассаланы битеуда 83 километрлик кесегин жолчула быйыл жангыртыргъа умут этедиле. Келир жыл а Пятигорск шахарны къатында жолда онсегиз километрлик участкасында мадар этилликди. «Кавказ» Управленияда айтханларына кёре, сёз алада асфальтны баш жанын жангыртыуну юсюнден барады.

Тийишли ишлени чеклеринде специалистле жолланы тозурагъан жерлерин къырып, ууакъ юзмезден бла чайырдан къатыш асфальт жайып, сыйдам этерикдиле. Бу технологияны аты «Сларри-Сил» деп алайды.

Дагъыда Управленияны ишчилери «Кавказ» трассаны Аргуданны бла Шимал Осетияны арасында кесегин тёрт ызгъа дери кенгертиу ишни башлагъандыла. Ала онбеш километрлик участкада жыйырмадан артыкъ эски быргъыланы орунларына жангыларын саллыкъдыла, буруула, жол белгиле, светофорла орнатырыкъдыла, тротуарланы да тап халгъа келтирликдиле. Бу ишни чеклеринде Лескен сууну башы бла баргъан кёпюрню да кенгертип ремонт этерикдиле. Хар нени да хазырлагъандан сора уа жолну узунлугъуна эки къатлы асфальт жайыллыкъды. Аны мурдорун а специалистле «геотекстиль» деген аула бла кючлендирликдиле.

Улбашланы Мурат хазырлагъанды.