Витязевэ къалэм дэт узыншагъэр щрагъэфIакIуэ «Витязь» спорт комплексым щекIуэкIащ кикбоксингымкIэ Урысей Федерацэм и чемпионатрэ зэхьэзэхуэрэ. «Лоу-кик» лIэужьыгъуэмкIэ зэхэта зэпэщIэтыныгъэхэм къекIуэлIащ ди къэралым и щIыналъэ куэдым къикIа спортсмен 1300-м нэблагъэ.

Къэбэрдей-Балъкъэрым кикбоксингымкIэ и школым и гъэсэнхэм Витязевэ медаль зэмылIэужьыгъуи 7 щызыIэрагъэхьащ.

Урысей Федерацэм и чемпионатым зыхэта гупхэм домбеякъ медалхэр къыщахьащ КIурашэ Регинэрэ (кг 52-рэ) Шэру Еленэрэ (кг 70-м щIигъу).

НыбжьыщIэхэм я къэралпсо зэхьэзэхуэм и дыжьын медалхэр зыIэрагъэхьащ ГъущIо Марат (кг 42-рэ), ХьэпцIэ Алан (кг 48-рэ), Гъубж Рустам (кг 51-рэ), Къардэн Дамир (кг 60) сымэ.

Зи хьэлъагъыр килограмм 48-м нэблагъэхэм я зэпэщIэтыныгъэм хъыджэбз цIыкIухэм я деж ещанэ щыхъуащ Абдурэхьмэн Дианэ.

Урысейпсо чемпионатымрэ зэхьэзэхуэмрэ къыщагъэлъэгъуа зэфIэкI лъагэхэм япкъ иткIэ КIурашэ Регинэрэ Гъубж Рустамрэ спортым и мастерым и мардэхэр ягъэзэщIа хъуащ.

Спортсменхэр зэхьэзэхуэхэм хуагъэхьэзыращ Сасыкъ Анзор, Куэшмэн Рустам, Къудейхэ Алимрэ Залымрэ.

Къэбэрдей-Балъкъэрым кикбоксингымкIэ и федерацэм и президент, WAKO лIэужьыгъуэмкIэ дунейпсо категорие зиIэ судья Къудей Алим зэхьэзэхуэхэм я судья нэхъыфIу къалъытащ.

МЭЗКУУ Къан.