Кёп болмай КъМР-ны эл мюлк министри  Хасан Сижажев, терек бахчалыкъда уруннганла да къатышып,  кенгеш бардыргъанды. Анда сёз  республикада бёлюмню болумуну эм  аны  айнытыуну юсюнден баргъанды.  Аны юсюнден бизге министерствону пресс-службасындан билдиргендиле. 

Тюбешиуню ача, министр Къабарты-Малкъарда промышленный  терек бахчалыкъ  эл мюлкню магъаналы бёлюмлеринден бирине саналгъанын чертгенди. Андан сора да, ол  эл мюлкню айнытыу программала ишлеп башлагъанлы республика  терек бахчалыкъны айнытыу жаны бла пилот регионнга айырылгъанын  эм бюгюнлюкде беш алчы субъектлени санына киргенин да чертгенди.  

Эсге сала айтсакъ, жыл сайын республикада терк айныгъан терек бахчаладан  1,5 минг гектар чакълысы   орнатылады. Аны бла бирге жыл сайын тахта кёгетле бла наныкъланы производствосуна да дайым  къошула барады. Алай бла былтыр мюлклени барысында да  сагъынылгъан ёсюмлюкледен  535,5 минг тонна тирлик жыйылгъанды. Ол былтыр бла тенглешдиргенде 103,5 процентге кёпдю.  

Республика жемиш, тахта кёгет эм наныкъ  продукция бла  кесин жалчытхандан сора да, бирси регионлагъа да жиберип,  импортну алышындырыу программаны толтурады. Келир заманда  бахчаланы санына къошула барлыкъды, алай эсе уа,  производство да  ёсерикди.   

Тюбешиуде бёлюмню айнытыу бла байламлы кёп тюрлю  соруу сюзюлгенди. Ол санда мюлкле  терекле, семиртгичле, химикатла бла къалай жалчытылыннганлары эм энчи техниканы да хазырлыгъы.                                                                                                                                                                                                                                                                                                                                                                                                                                                                                                                      Ахырында Хасан Сижажев терк бахчалыкъ жаны бла Къабарты-Малкъар мындан арысында да алчылыкъны жибермезге кюреширге кереклисин  айтып, ведомство предпринимательлеге къолундан келгенича болушлукъ тапдырлыгъын да эсгертгенди.

Магометланы Сулейман.