РФ-ни Эл мюлк министерствосу аш-суу къоркъуусузлукъну жалчытырча мындан арысында да  производствону ёсдюрюрге таукелди.  Ол шарт импортну алышындырыугъа да себеплик боллукъду. Аны юсюнден бизге КъМР-ны Эл мюлк министерствосундан билдиргендиле.

Бюгюнлюкде,  къыйын болумгъа да къарамай, эл мюлкню  тюрлю-тюрлю бёлюмлери жетишимли ишлейдиле. Эт чыгъарыу жаны бла миллет ассоциацияны толтуруучу комитетини  таматасы Сергей Юшин айтханнга кёре, къыралда эт продукция бла  болум игиди эм ол дайым кёбейип барады. Ол айтханыча, арт жыйырма жылда Россей эт чыгъарыу жаны бла эм уллу импортёрладан бири болгъанды.

Тахта кёгетле да жетерча  бардыла. Болсада бусагъатда аланы бир къауумуну багъалары иги кесекге кётюрюлгендиле. Экспертле айтханнга кёре, ол аланы сакълаугъа этилген къоранчла эм продукция терк бузулургъа ёч болгъаны бла   байламлыды.  Болсада жангы тирлик жыйылгъаны бла багъала  тюшерикдиле. Тюбешиуде  бёлюмню айнытыуну юсюнден да айтылгъанды.

Сергей Юшин санкцияланы кезиуюнде да ич рынок  тахта кёгетле бла  толу  жалчытылыннганын  билдиргенди.  Сёз ючюн,  кёгетлени Европадан 2014 жылдан бери келтирилмегенлерин эсге салгъанды.  Аны бла бирге продукция   Египетден, Израильден, Турциядан, кёбюсюнде  уа Узбекистан бла Таджикистандан келтирилгенин чертгенди.

Къабарты-Малкъарны юсюнден айтханда, республика эт, сют эм тахта кёгетлени  чыгъарыу бла  жетишимли кюрешеди.  КъМР-ни Эл мюлк министри Хасан Сижажев айтханнга кёре, былтыр эл мюлк продукциядан 68,8 миллиард сом багъасы чыгъарылгъанды. Буруннгу жыл  бла тенглешдиргенде ол 110 процентге кёпдю.  Аны бла бирге битимчилик, малчылыкъ эм жарашдырыучу производствода да   ахшы ёсюм  эсленеди.

 - Бюгюнлюкде бёлюмню  баш борчларындан бири жамауатны  кеси къыралыбызда чыгъарылгъан,  социал магъаналы  продукция  бла  сылтаусуз этергеди. Аны бла байламлы  быйыл  агропромышленный комплексни айнытыугъа эл мюлк производительлеге  2,38 миллиард сом чакълы бёлюнюрюкдю,-  деп къошханды Хасан Сижажев.   

Магометланы Сулейман.