Адамланы къутхарыу, кесинги жанынга къоркъуу болгъанына къарамай, кюн сайын къыйын болумлагъа тюшгенлеге болушлукъ этиу Россейни МЧС-ини Элбрус бийик тау-къутхарыу отрядыны ишчилерини жашау жорукъларыды. Аллай уста къутхарыучуладан бири Хаджиланы Азнорду, ол юч жюзден аслам къутхарыу-излеу ишге къатышханды, аланы кезиулеринде аслам адамны ёлюмден сакълагъандыла. Усталыкъны сайларгъа себепликни гитчеликде сингдирилген ниетле, абадан бола баргъаны бла тохташхан акъыл этедиле. Жюрек чакъырыууна бойсунуп, Азнор да 2009 жылда къадарын бу огъурлу иш бла байламлы этерге сюйгенди.
 Отряд ишин республиканы битеу жеринде да – анга Кавказ хребетни аслам кесеги, таула, агъачла, суула да киредиле - тамамлайды. Ала жангыз да Къабарты-Малкъар бла чекленмей, Ставрополь крайда, Шимал Осетия-Аланияда, Къарачай-Черкесде да къыйын болумла салгъан заранны кетерирге кёп кере къатышхандыла. Къутхарыу операцияланы кезиулеринде жюзле бла саналгъан адамланы жанларын сакълагъандыла. Азнор 2017 жылда Элбрус районда болгъан табийгъат къыйын болумланы кезиуюнде халкъны къоркъуулу жерден чыгъарыугъа, ырхыладан баш магъаналы объектлени тазалаугъа, 2016 жылда Ставрополь крайда суу кётюрюлгенинден сора болгъан хатаны кетериуге къатышханды.

Узун, юч кюннге созулгъан излеу-къутхарыу операцияны юсюнден айта, Азнор 2020 жылны 22 ноябринде алагъа Краснодар крайдан турист Гара-Башыны тийресинде 3800 метр бийикликде ажашханыны юсюнден билдириу келгенин эсгереди.

- Элбрус бийик тау отрядны къауумунда мен да мычымай жолгъа чыгъабыз. Тау тикни талай кесекге юлешип, къауум-къауум болабыз. Турист къайда болгъанын айталмагъаны излеу операцияны бютюн къыйын этеди. Кюнню халы да себеплик этерча тюйюл эди – тёгерекни туман басып зат кёрюнмейди, жел хыны урады, жылны бу кезиуюнде таулада кюнню узунлугъу къысха болгъаны да операцияны кёпге создурады. Жангыз да юч кюнден сора, 24 ноябрьде 10:30 сагъатда ажашханны 3750 метр бийикликде тауну къыбыла-шаркъ жанында табабыз. Аны халына къарайбыз, биринчи болушлукъну этебиз, чай ичире, жылытыргъа кюрешебиз. Ол шокда эди, жарсыугъа, къоллары бла аякълары да юшюп, аны ючюн туристни тюбюне тюшюрюрча вертолётну чакъырабыз. Анда аны терк медициа болушлукъ этиу службаны келечилерине тапдыргъанбыз, эр кишини жашаууна къоркъуу жокъ эди, - дейди Азнор.

 Быллай къутхарыу операцияланы юслеринден айта, Хаджи улу не гитче шартланы да унутмайды. Бардыргъан ишлери къутхарыучуну эсинде кинопленкадача сакъланнгандыла.  

Таулу жерлени энчиликлери, кюнню халы отрядха салыннган борчланы тамамларгъа иги да чырмаучудула. Болсада быллай чурумла жигит, къоркъа-сагъая билмеген адамлагъа ачыгъаннга болушуудан тыймайдыла. Азнор чертгенича, отрядха кюч, ниет жаны бла да къарыулу, батыр, шуёхлукъну жюрюте билген адамла киредиле. Алагъа тюз кесимеча ышанама, ансыз а таулада жарамайды, дейди ол.

 Къутхарыуда жангыз да терклик азлыкъ этеди, ол харкюнлюк, кёп къыйын алгъан ишди, аны сайлагъанла тохтаусуз жарау бардырадыла, билимлерин, хазырлылыкъларын ёсдюрюрча юйрениулеге къатышадыла. Азноргъа альпинизмден экинчи разряд берилгенди, таулада къутхарыу операцияладан жетону барды, министерствода бийик усталыгъы ючюн аны кёп кере белгилегендиле, «Ёле тургъанланы къутхаргъаны ючюн» къырал саугъагъа тийишли болгъанды. Азнор Элбрусха 200-ден аслам кере чыкъгъанды, Сибирьни эм бийик тауу Белухагъа, Бызынгыда Урал деген тикге, башха таулагъа да ёрлегенди.

Кульчаланы Зульфия.