Узыншагъэм и дунейпсо махуэм ирихьэлIэу Налшык къалэм щекIуэкIащ «Узыншагъэм ухуэзышэ лъэбакъуэ 10000» жылагъуэ-хэзыгъэгъуазэ акцэ. Абы и къыхуеджэгъэ нэхъыщхьэу щытащ «ЩIы Хъурейм и узыншагъэр - дэ ди узыншагъэщ!».

Зэхыхьэм хэтхэр, судьяхэр, медицинэм и лэжьакIуэхэр, шынагъуэншагъэр къызэгъэпэщынымкIэ IэнатIэхэр щызэхуэсащ ХьэтIохъущокъуэм и жыг ха­дэм и ихьэпIэм деж. Медицэ факультетым и студентхэм хэт хуейми я лъы­дэуейр (давленэр) къыхуапщащ, инфекцэ узу щымыт ущIэпIейтеин узыфэхэм (гу-лъынтхуэ, лъатэуз, фошыгъу диабет) ехьэлIа чэнджэщхэр ятащ. 
Iуэху щхьэпэр къызэIуахащ Къэбэрдей-Балъкъэрым узыншагъэр хъумэ­нымкIэ и министр Къалэбатэ Рустам, Парламентым и УнафэщIым и къуэдзэ, олимп чемпион Къардэн Мурат, «Лига здоровья нации» зэгухьэныгъэм и щIыналъэ къудамэм и Iэтащхьэ Къамбэ­чокъуэ Заретэ. Абы кърихьэлIат республикэм и хабзэгъэув IэнатIэм и Уна­фэщI Егоровэ Татьянэрэ и къуэдзэ Жанатаев Сэлимрэ.
Узыншагъэр щрагъэфIакIуэ акцэм хэтахэр жыг хадэ ихьэпIэм къыщыщIэ­дзауэ Курорт пэшым нэс дэкIуейри ­къехыжащ. Псори зэгъусэу хэтащ цIыху миным нэблагъэ. Абы кърихьэлIат Налшык къалэм дэт курыт еджапIэхэм я гъэсэнхэр, республикэм и еджапIэ ­нэхъыщхьэхэм я студентхэр, Къэбэрдей-Балъкъэр Республикэм и Парламентымрэ Правительствэмрэ щыщхэр, къалэдэсхэмрэ къалащхьэм и хьэщIэ­хэмрэ. 
 

Къэхъун Бэч.