Къабарты-Малкъар Республиканы Башчысы Казбек Коковну таматалыгъында Бахсанда КъМР-ни Терроризмге къажау комиссияны тышында къуралгъан кенгертилген жыйылыуу бардырылгъанды. Повесткагъа жер-жерли самоуправление органланы эм терроризмге къажау муниципал комиссияланы ишлерини соруулары къошулгъандыла.

Тюбешиуге КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, РФ-ни Президентини СКФО-да толу эркинликли келечисини аппаратында КъМР-де федерал инспектор Дмитрий Васильченко, муниципал къуралыуланы администрацияларыны таматалары, регионну право сакълаучу органларыны оноучу къаууму къошулгъандыла.

Терроризмге къажаулукъ бёлюмде болумгъа магъаналы жамауат-политика эм социал-экономика процесслени тинтиуню эсеплерини эм ол ишни игилендириу амалланы юслеринден КъМР-ни министри Залим Кашироков айтханды. Бюгюнлюкде болумгъа кёре республикада тутулуп чыкъгъанла, ол санда террорист жаны бла аманлыкъла этгенлери ючюн азап сынагъанла жашайдыла. Казбек Коков ол къауум бла тохтаусуз энчи ишлерге тийишлисин чертгенди. «Ол ызда кёп жумуш тамамланнганды. Профилактиканы субъектлери эм объектлери белгиленнгендиле, методика жарашдырылгъанды, энчи тюбешиуле боладыла», - деп белгилегенди Казбек Коков.

Терроризмни ниетлерине тюшерге боллукъ  инсанланы ол жолдан тыярча, ала халкъла аралы террорист организацияланы ишлерине къошулмазча, Иракда, Сирияда къаугъала болгъан тийреледен къайтарылгъан сабийлени реабилитацияларын бардырырча эм аланы араларында радикал ниетле жайылмазча этиу энчи профилактика ишни эсеплерин Залим Кашироков, Урвань районну муниципал администрациясыны таматасы Валерий Ажиев, Черек районну муниципал администрациясыны таматасы Къулбайланы Алан, Элбрус районну муниципал администрациясыны таматасы Сотталаны Къурман билдиргендиле.

Нальчик шахар округну, Бахсан шахар округну, Чегем муниципал районну жер-жерли администрацияларыны таматалары Таймураз Ахохов, Хачим Мамхегов, Юра Борсов муниципал АТК-ланы ишлерин тинтген кезиуде ачыкъланнган кемчиликлени кетериу жаны бла амалланы юслеринден айтхандыла.

КъМР-ни Башчысы Казбек Коков бу жаны бла ишни тирилтирге кереклисин эм «терроризмни болдурмазча этиуню битеу ызларында бирлешип ишлеуню амалларын жарашдырыргъа, муниципал АТК-ланы МВД-ны эм ФСБ-ны район бёлюмлери бла байламлыкъларын кючлерге кереклисин» белгилегенди.

Сёлешиулени эсеплерине кёре жыйылыугъа къатышханла бир бирлерине оюмларын билдиргендиле эм этилген оноуну къабыл кёргендиле. Казбек Коков кенгешде айтылгъан темалагъа кёре бир ненча излемни баямлагъанды. Республиканы оноучусу власть органлагъа эм башында халкъны къоркъуусузлугъу болургъа кереклисин чертгенди, ол ишде ведомствола аралы байламлыкъланы магъанасыны уллулугъун айтханды.

Къабарты-Малкъарны Башчысы ишде «Единая Россия» терроризмге профилактика этиу жаны бла жарашдыргъан жангы документлеге таяныргъа боллугъун эсгертгенди, белгиленнген эсеплени эм буйрукъланы эсге алып, ишни андан ары бардырыргъа тийишлисин айтханды.

«Биз профилактика халлы жамауат башламчылыкълагъа, НКО-ланы ишлерине да билеклик этерге хазырбыз – аны ючюн деп Россейни Президенти регионлагъа тийишли эркинликле бергенди.  Адамлары миллетчилик, террорист ниетлеге табынып, бирлени геополитика сейирлери ючюн кеслерини къарындашларын къурутургъа чыкъгъан Украинаны жарсыулу сынамы дерсди» - деп чертгенди Коков.

Ахырында регионну Башчысы жыйылгъанланы «битеу дуниягъа къарындашларын къорууларыгъын билдирген къыралыбызны тарыхында магъаналы шарт», Кърымны Россейге къошулгъанына сегиз жыл толгъаны бла, алгъышлагъанды.