Бэрбэч ХьэтIутIэ и цIэр зезыхьэ Къэбэрдей-­Балъкъэр къэрал университетым и утым деж ­дыгъуасэ щекIуэкIащ «Крымская весна» пэкIу-концертыр, Урысейм Кърым Республикэр къы­зэрыхыхьэжрэ илъэсий зэрыхъум ­теухуауэ.

- Ди къэралым и Президент Путин Владимир къищта унафэхэм псори дыкIэлъыплъащ. Ахэр ­теухуащ Урысейм и щIэблэм я шынагъуэншагъэм. Апхуэдэу Донбасс щекIуэкI зэпэ­щIэ­тыныгъэми дыкIэлъоплъ. А щIыналъэм мамы­рыгъэр икIэ­щIы­пIэкIэ щызэтеувэжу, абы къулыкъу щызыщIэ ди ­щIалэхэм къагъэзэжу я гъащIэм, зыужьыныгъэм пащэжыну ди хъуэпсапIэщ, - жиIащ зэхыхьэр езыгъэкIуэкI Ало Белинэ. - ПэкIум цIыху 1000-м щIигъу къекIуэлIащ, Кърымыр Урысейм къызэрыгухьэрэ илъэсий зэрырикъур ягъэлъэпIэн папщIэ. Къе­мыкIуэлIэфами, Къэбэрдей-Балъкъэрым, Урысейм ис псоми а гуфIэгъуэр гукIи псэкIи къыддагъэлъапIэ. Ди къэралым, абы къыщIэхъуэ щIалэ­гъуалэм я зэфIэкIым дрогушхуэ.
- 2009 гъэм экономикэ факультетыр къыщызуха университетым сыщрагъэблагъэкIэ сыт щыгъуи си гуапэу къызогъэзэж, - жиIащ ЩIалэгъуалэм я зыу­жьыныгъэмкIэ фондым и унафэщI Ковалевэ Али-нэ. - Урысей тхыдэр къыгуэхыпIэ имыIэу зыдэдгуэш Кърымымрэ ди къэралымрэ я зэкъуэтыныгъэр зэрыдгъэлъапIэм мыхьэнэшхуэ иIэщ. Лъэпкъхэм я зэхуаку мамырыгъэ дэлъыну, зыужьыныгъэм, узыншагъэм ини цIыкIуи дыхущIэвгъэкъуну фыкъы­хузоджэ! Псом хуэмыдэу нобэ дызэщIыгъун, зыр­ адрейм дыдэIэпыкъун хуейщ!
Апхуэдэу зэIущIэм къыщыпсэлъащ «Садсервис» ООО-м и унафэщI Ашэбокъуэ Тимур, КъБКъУ-м и студентхэм я лIыкIуэ Мурачаев Исхьэкъ, нэгъуэщI­хэри.
Зэ­хыхьэр ягъэдэхащ республикэм и уэрэ­джы­IакIуэхэмрэ къэфакIуэхэмрэ, уэрэдымрэ къафэмкIэ «Амикс» театрым и уэрэджыIакIуэ ДыщэкI Артур, КъБР-м и цIыхубэ артист Текуев Амур, нэ­гъуэщIхэми.

ТЕКIУЖЬ Заретэ. Сурэтхэр Къарей Элинэ трихащ.