Къабарты-Малкъарны Жамауат палатасында 1941-1945 жыллада Уллу Ата журт урушда фашизмни ууатыугъа къыралыбыз этген къошумчулукъгъа жалгъан сёзле айтыугъа къажау кюреш бардырыуну юсюнден проблеманы сюзгендиле.

  Жыйылыуну палатаны граждан обществону институтларын айнытыу, миллетле эм динле аралы байламлыкъланы игилендириу, коммерциялы болмагъан секторну айнытыу жаны бал комиссиясыны келечиси Мухамед Шихабахов ачханды. Ол Уллу Ата журт урушда совет халкъ кёргюзтген жигитликни ёмюрледе сакълауда, тарых ишлени жалгъандан къоруулаугъа коммерциялы болмагъан организацияла (НКО), адамла кеслери да башламчылыкълары бла уллу къыйын салгъанларын белгилегенди. Аны оюмуна кёре, ётюрюкню тыйыуда, къыралдан сора, НКО-ла да къошумчулукъ этерге тийишлидиле. Аны бла байламлы ол организацияла ишлерини эсеплерин чыгъаргъанда, отчётларында тюз тарыхны сакълаугъа жоралап къаллай жумушла тамамлагъанларыны юсюнден да жазаргъа керекдиле, дегенд

Миллетлени ишлери эм жамауат проектле жаны бла министрни орунбасары Гергъокъланы Джамбулат республиканы халкъларыны фашистлени ууатыугъа этген къошумчулукъларыны юсюнден информацияны жайыуда жамауат организацияла бла къаллай байламлыкъла тохташдырылгъанларыны юсюнден билдиргенди. Ол айтханыча, бюгюнлюкде регионда эсепде 896 коммерциялы болмагъан организация барды, аладан 25-си ветеран, патриот эм излеу-къуралыу ишлерин республика даражада тамамлайдыла, 52-си районлада орналыпдыла. Ата журтну къоруулай жан берген аскерчилени ёлюклерин табыу эм аланы басдырыу, белгисиз тас болгъанланы атларын тохташдырыу бла юч организация кюрешеди: «115-чи кавалерия дивизияны атын жюрютген Нальчик шахар аскер-патриот организация», Элбрус районда «Мемориал-Эльбрус» эм «Кавказский рубеж» излеу отряд».

  Жарыкъландырыу, илму эмда жаш тёлюню ишлери жаны бла министерствону  бёлюмюню башчысы Мурат Гилиев аскер-патриот юйретиу жаны бла «Авангард» методика ара къуралгъаныны, аны мурдорунда окъуу жылны ичинде, каникулланы кезиуюнде юйрениу жыйылыула бардырыллыкъларын билдиргенди. Ол жаш адамланы «ЮНАРМИЯ» регион бёлюмюнде къуллукъ этерге хазырлагъан араланы ишлерине себеплик боллукъду, башха патриот ишлени къураргъа да болушурукъду. Мурат Гилиев билдиргенича, 2021 жылда патриот проектлеге былтыр 72433 адам къатышханды.

 Палатаны члени Хаути Сохроков Уллу Ата журт урушну юсюнден сабийлеге, эм алгъа, юйюрледе бла мектепледе билдиргенлерин чертгенди. «Къазауатны тарыхда, адамланы эслеринде сакълауда тёрели мадарла бла бирге бусагъатда жангы амалла да хайырланыладыла. Аны юсюнден информация кёпдю, жайылыпды, аны тапхан къыйын тюйюлдю. Бизни борчубуз а ёсе келген тёлюлеге ол урушну эм аны жигитлерини юслеринден юйде, школда, социальный сетьледе, телевизорда не къадар кёп айтыргъады, ол къадарда ала абадан бола баргъанлары бла кертини ётюрюкден айыраллыкъдыла», - дегенди ол. 

  Жыйылыуну эсеплерин чыгъара, палатаны граждан обществону институтларын айнытыу, миллетле эм динле аралы байламлыкъланы игилендириу, коммерциялы болмагъан секторну айнытыу жаны бла комиссиясыны башчысы  Николай Маслов Уллу Ата журт уруш XX ёмюрде жангыз бизни къыралны угъай, битеу дунияны да тарыхында ыз къойгъан иш болгъанын белгилегенди. «Ол къыралыбызны тюненесиди, къазауат не къыйын болгъан эсе да, аны миллетлени эслеринде къалдырыу баш магъаналы политика, ниет, маданият борчду», - дегенди ол. 

 Ахырында айтылгъан оюмлагъа, докладлагъа кёре эсгертиуле жарашдырылгъандыла, ала сейирлери болгъан ведомстволагъа бла жамауат организациялагъа жиберилликдиле, деп билдиредиле палатаны пресс-службасындан.

Кульчаланы Зульфия.