Элбрусдагъы излеу-къутхарыучу отряд Россейни МЧС-инде бек игиледен бирине саналады. Жыл сайын ол таулада жюзле бла саналгъан энчи къутхарыу операцияла бардырады. Ала уа асламысында уллу кишиликни, гиртчиликни, усталыкъны да излеген бек къыйын болумлада ётедиле. Анга уа кёп болмай Элбрусда болгъан ишледен бири да шагъатлыкъ этеди.
Ол заманда къутхарыучула, тенгизден беш минг метрден уллу бийикликде амалсыз болуп тургъан къаячыланы табып, тик таудан энишге тюшюргендиле. Ёлгенлени да керекли жерге жетдиргендиле. Аланы батырлыкъларына бла жигерликлерине КъМР-ни Башчысы Казбек Коков да бийик багъа бергенди, ала бла тюбешип, ыразылыгъын билдиргенди.
Отряд къуралгъан 1992 жылдан бери къаллай бир къутхарыу операция бардырылгъанды! Санап чыкъгъан окъуна къыйынды. Жыл сайын Минги тауну тийресине мингле бла туристле келедиле. Аладан кёплени Элбрус кесине тартады. Алай анга ёрлейме деп келгенлени араларында анга тынгылы хазырланыргъа, хауасына юйренирге, къутхарыучуланы эсеплерине тюшерге, уста жол кёргюзтюучю бла бирге чыгъаргъа керек болгъанларын унутуп къойгъанла кёпдюле. Ала уа къыйын болумгъа тюшмей къалмайдыла, аланы энишге тюшюрюрге да алай тынч тюйюлдю.
Элбрусдагъы излеу-къутхарыучу отряд ишлерин таулада кибик, ёзенледе, черекледе, кёлледе да бардырадыла. Къар юзюлгенде, ырхы келгенде, жер кёчгенде, башха къыйын табийгъат болумлада, адамла юйлеринде ачыгъан, авариялагъа тюшген кезиуледе да ала терк жетедиле.
Отрядда билдиргенлерине кёре, ол къуралгъанлы 2,5 мингден аслам къутхарыу иш бардырылгъанды. Мингле бла адамланы жашаулары, саулукълары сакъланнганды. Аланы къутхарыу бла уа жетмишден адам кюрешеди. Аланы барысыны да бийик усталыкъ квалификациялары бардыла. Тёртеулен а «Россейни сыйлы къутхарыучусу» деген махтаулу атны жюрютедиле, бешеулен – халкъла аралы класслы къутхарыучуладыла, кёплени уа биринчи квалификациялары бардыла.
Коллективде къутхарыучула болуп туугъандыла дерча адамла да аз тюйюлдюле. Ала усталыкъларын энчи окъуу аралада дайым ёсдюредиле, лыжалада учаргъа, бузлада жюрюрге, тик къаялагъа ёрлерге, башха затлагъа да юйреннгенлей турадыла. Айхай да, хар энчи къутхарыу операциядан сора да, аланы сынамларына къошула барады.
Къутхарыучуланы профессионал байрамларыны кезиуюнде айырмалы болгъанланы саугъалау тёреге айланнганды. Бирлени ведомстволу саугъала бла белгилейдиле, бирлеге квалификацияларын кётюредиле. Арт жыллада Элбрусдагъы отрядны къутхарыучуларыны къаууму «Къутхарыуда бирге ишлерге», «Къутхарыу кезиуде кишилик этгени ючюн», «Къыйын болумну хаталарын кетериуге тири къатышханы ючюн» майдаллагъа эмда Россейни МЧС-ини юбилей майдалларына, «Бет жарыкълы къуллукъ этгени ючюн», «Жетишимле болдургъаны ючюн» эмда башха белгилеге тийишли болгъандыла.
Озуп баргъан жылны эсеплерине кёре да, бир ненча адам «МЧС-ге ХХХ жыл» деген майдал бла саугъаланнганды. Аланы араларында излеу-къутхарыу бёлюмлени башчылары Атаккуланы Ибрагим, Валекрий Петухов, халкъла аралы класслы къутхарыучу Мишаланы Ахмадия, биринчи класслы къутхарыучула Николай Моков, Татчаланы Тахир, Тилланы Алий да бардыла. Бу жолгъу профессионал байрамны кезиуюнде да кёпле саугъаланырыкъларына сёз да жокъду.
Россейни сыйлы къутхарыучусу, халкъла аралы класслы къутхарыучу Гюлюйланы Абдуллах башчылыкъ этген отряд профессионал къараулада да, Шимал-Кавказ эмда Юг федерал округланы бёлюмлерини араларында бардырылыучу конкурслада да кёп кере хорлагъанды.
Элбрусчу къутхарыучула жылны не тюрлю кезиуюнде да, кече-кюн демей, къыйын болумгъа тюшгенлеге болушлукъгъа келирге хазырдыла. Аланы къыйын эмда къоркъуулу ишлери керекли эм магъаналы болгъанлай къалады.
Анатолий ТЕМИРОВ.
Суратлада: къутхарыу ишле барадыла.
